Юхакъаьста хӀамаш чакхъяхарах, царца боаггӀаш бола болх барах дийцар мехка
Совъяьнна юхакъаьста хӀамаш чакхйоахаш дӀабахьа безача балхах, цу оагӀонца дувзаденнарех дувцаш, кхетаче дӀайихьар вай мехка. ВӀашагӀкхетаре дакъа лоацаш бар вай мехкада Келаматанаькъан Махьмуд-Ӏаьла, Россе вице-премьера Секретариата кулгалхочун гӀонча Хатуов Джамбулат, Российски экологически оператора кулгалхо Тарасова Ирина, иштта РФ Ӏалама гӀулакхех йолча министерствон болхлой.
Мехкадаь зарбан болх лелабераша белгалдечох, юхакъаьстача хӀамашцара болх мехка боаггӀача боараме тоабарах дийцар гулбеннараша. Иштта цига хьоахадир, РЭО вай мехка цу оагӀонцара гӀо де кийча болга.
Из къамаьл дӀадоладалехь, ГӀажарий–Юрта тахан из болх дӀахьош йолча моттигага, 200 эзар тонн совъяьнна хӀамаш чакхйоахаш хургйола кердаяр хьалъе лаьрхӀа къоастадаьча доазонга хьежар хьакимаш. Федеральни оагӀоно гӀо деш дӀахьоргья из проект.
Вай Мехкадас кхетаче белгалдир, республика тахан ший хӀама экологически оагӀоно дӀадеххача тайпара тоаде лаьрхӀа йолга. Гонахьарча Ӏалама хьал меттадоаладеш, цун тӀалатта низ лаьгӀбеш хургба из болх.
«Баркал оал аз тахан Тарасова Иринайна, цунцарча тоабанна, экологецара хьал тоадара де дезар хьалхадаккхарах, федеральни оагӀоно гӀо дергдолаш хьаоттадарах», - белгалдир вай Мехкадас.
