Гаьгенаькъан Руслана вӏашагӏкхетар хилар, РФ дешара Министерствон викалца Гӏазданаькъан Идрисаца
Гӏалгӏайчен Халкъа гуллама спикера Гаьгенаькъан Руслана вӏашагӏкхетар хилар; Россе дешара Министерствон къаман дешара, халкъашта юкъерча бувзама Департамента кулгалхочун гӏончаца, экономически ӏилмай кандидатаца, Россе Паччахьалкхенна чуйоагӏача Финансай университета бизнеса кафедра доцентаца Гӏазданаькъан Идрисаца. Къамаьл деш, республикан законаш хьакхоллара йолча моттига кулгалхочо баркал аьлар къонача ӏилманхочоа, дешара даькъ тӏа цо дика толамаш дахарах. Гаьгенаькъан Руслана теркалдир дешархой программа дика дегӏайоалаяра гӏулакха доккха дакъа юкъедена хилар, иштта Абхазе, Белоруссе гуманитарни таронаш йоаржаяр. Цул совгӏа, цар дийцар «Россе хьехархо доазол арахьа» яхача халкъашта юкъерча проектах, из дӏахьош вар а Гӏазданаькъан Идрис ва.
«Сердало» газетага, Халкъа Гуллама зарбан болх лелабераша ма алллара, керттера дийца дош дар «Росси - са мохк» яха мобильни парк республике хьакхолларах лаьца. Из Магасе, Алания майдан тӏа хьайийллар ардара бетта 26-ча дийнахьа. Из Гӏалгӏайчен бахархой терко тӏаозаш йола боккха кхетам балара, дешара моттиг я, цо таро лу интерактивни таьрахьий кепара мехка истори довза. Гӏазданаькъан Идриса дика дакъа лаьцар, из лоархӏаме проект хьакхоллаш.
Кхыча паркашка хьежача, Магасера керда майда 12 архитектурни кеп йолаш я. Цун я ший кинозал, сердалонца лелаеш йола экранаш. Гӏалгӏайченна лаьрхӏа хьаяьй интерактивни программаш, викторинаш, цига дувц Гӏалгӏайчен истори, ӏадаташ.
Къаьстта йола моттиг дӏалоацаш да гӏалгӏай къаман викалаш бовзийташ дола гойтамаш. Уж ба Боазаркъанаькъан Идрис, Россе хьалхара Турпал, лётчик Осканаькъан Сулумбик. Хьажа хьабоагӏача наьха таро я берригача мехкаца шоай къаман истори дувзаденна хилар го.
Гаьгенаькъан Руслана лакха мах оттабир технологе проекта, цо белгалдир цу тайпара гӏулакхаш кагирхошта юкъе дегӏадоаладаро, дика кхетам балара таро хьакхоллаш хилар. Гӏалгӏайчен Халкъа Гуллама кулгалхочо яхачох, вай заман дӏа-юха лела парк накъайоалаш я мехка истори довзара, кагирхой культуран мах бараш вӏашагӏтохара.
