Кагирхошта, даьшта-ноаношта лаьрхӏа йолча «Никъ 31» яхача проектах дийцар мехкарча СК
Вай мехкарча Россе СК Тохкама оагӏон моттиге дийцар «Никъ 31» яхача хоамий - хӏама доаржадара проектах. «Кагирхойи бераши» яхача къаман проектага гӏолла дӏахьош ба 18 шерга кхачанза бараш, кагирхой террористически оагӏонцарча зуламашта юкъе ца бахийтара тӏехьа боаржабеш бола из болх.
«Сердалога» тахан кхаьчача хоамах, къонабараш тувлбе, ӏехабаь цу бӏехача гӏулакхашта юкъе чуоза гӏертарий хӏама дохададаь, зуламхоша низ тӏалоаттабеча къонабарашта гӏо дарах латташ да цу проекта керттера декхар. Къонача тӏехьенна уж деррига хӏамаш ма дарра дӏадовзийтар, воча гӏулакхех уллуврбараш лорабар, юстара хилийтар да тахан лоархӏаме. Сайте белгалду, ханнахьа меттавена, ше леладечун уйла яь, нийсача наькъ тӏа ваьнначунна, набахта ца водаш, кӏалхарвала аьттув болга.
«Никъ 31» яха цӏи ший лаьрхӏа маӏан долаш я, ше раьза волаш зуламах лоравалар чудоагӏача Россе УК 31 ст. хоттам болаш я из. Нийса никъ малагӏа ба хьахайт цо ӏаьдала бокъонга диллача, моллагӏа зулам дӏачакх ца доаккхаш, ше леладер харцахьа долга кхетадаь саг бехктокхаме озац. Ше кӏалхараваккха, доккхача зулама доакъашхо ца хила, ший ираз ше доадаьрех ца хила аьттув лу тахан ӏаьдало цу наха. Проекта керттерча портале дувц къонабарашта, иштта цар даьшта, ноаношта ха дезаш дола хӏамаш.
Сайте оттадаьраша аьттув лу къонабараш лебаь, тувлбаь, шоаш дувцачох тешабаь бӏехача зулама юкъе чуоза гӏертараш ханнахьа гучабаха. Интернета оагӏонашка гӏолла тийшаболх боаржабе гӏертача бӏехача зуламхошта, моастагӏашта духьала геттара чӏоагӏа эшаш да из.
Вай мехкарча Россе СК Тохкама оагӏон болхлоша къонабараш, цар даьй, ноаной фийла, лоралуш хилара тӏахьех тахан. Нагахьа зуламхоша низ беш, шоаш дувцачох тешаваь леве гӏерташ хӏама хоаденнадале, ӏалаьмате чехка хоам бе беза ӏаьдала болхлошка.
Выход 31.рф. яхача проекта сайте довза йиш я цу оагӏонца дувзаденна хӏама.
