Гӏалгӏай мехка театраца бувзабенна берий кхоллама болх гойтар
Шолжа шахьара культуран Цӏагӏа, «Фаьлг болча хьоашалгӏа» яха берий кхоллама болх гойтар. Ерригача республикера начӏал дола бераш вӏашагӏтохара хьал хьакхеллар яр Гӏалгӏайчен арахьара бувзам лелабара, къаман политикан, зарбан, хоамий Министерство.
«Сердало» газетага из болх вӏашагӏбеллараша ма аллара, проекта керттера маӏан дар, кхувш йоагӏача тӏехьен таронаш йовзар, сценаца ювзаенна говзал езаялийтар, мах болча культуран тӏехьаленга уж бахар.
Культуран-салоӏама моттига сцена тӏа эрсий халкъа фаьлга, шоаш хьакхеллача багахбувцама, Даькъастен халкъа къаьнарча къамаьла театра таронаш йоаржайир. Республикан культуран урхалленашка, юкъерча дешара ишколашка ӏомалуш болча къонача артисташа гойтар, шоашта дукхагӏа дезача фаьлгашка дакъа лоацаш болча турпалхой юхь ловзае ховлга.
Хӏара зӏамига спектакль хила езаш яр 15 минота. Кхелахочо мах оттабир юхь ловзаяра говзала, сцена тӏа къамаьл де хара, тӏабувха гӏирс хоза хилара.
Котбаьннарашта юкъера цхьа саг харжа хала дар - уж берригаш а бар дика кийчо яь. Цу тайпара кхелахочо шин тоаба елар хьалхара моттиг – Соагӏапчарча №30 йолча юкъерча ишколан театральни студена, Шолжа кхален культуран Цӏагӏа ӏомалуш барашта.
Уж шаккхе а тоаба дика кийчо яь хилар тӏаийцар. Из болх вӏашагӏбеллараша белгалдир, цу тайпара фестиваль дӏахьош хиларо культурашта юкъера къамаьл чӏоагӏду, бераш зӏамига долча хана денз, лерттӏа кхетам балара таронаш хьакхолл.
