Ишколашка, культуран Цӏеношка аха лаьрхӏа ба мехкарча филармоне солисташ, симфонически оркестр
Хамхой Ахьмада цӏерах йолча Паччахьалкхен филармоне доакъашхой, лайчилла бетта лаьрххӏа кхоллама программа кийчъеш ба. Магаса, Шолжа-Шахьара, Наьсарен моттигашка, иштта мехкарча юрташка гӏолла гобоаккхаргба укх бетта симфонически оркестро, солисташа, иллиалархой тоабаша. Республикан бахархошта бӏарчча программаш, концерташ-шоу кийчдаьд цар.
Лайчилла бетта 4-ча дийнахьа Россе къамаш цхьанкхетара Ди дездеш, Шолжа-Шахьаре нийсса сахьат даьлча концерт гойтаргда цар; хӏаьта лайчилла бетта 10-ча дийнахьа, полице Денна хетадаь цӏай хьаллоацаш, Магасе ӏаьдала болхлой даькъалабувцаш, Магасе хургба уж.
Симфонически оркестро «Хозаярги Акха саги» яха концерт-шоу гойтаргда берашта. Мехкарча йиъ моттиге хургда из нийсса ши сахьат даьлча долалуш. Лайчилла бетта ийслагӏча дийнахьа Яндарерча «Олимп» яхача лицее хургья шоу, 14-ча, 21-ча деношка Наьсарерча №20, №18 йолча ишколашка, лайчилла бетта 28-ча дийнахьа - Долакха-Юртарча №3 йолча ишколе.
«Пушкина карта» яхача федеральни программага гӏолла болх дӏахьош хургба укх берригача бетта. «Марем» яхача гимназе гуллургба укх бетта 3-ча дийнахьа, хӏаьта 5-ча дийнахьа Шолжа кхален культуран Цӏагӏа. Дӏахо, 14-ча дийнахьа Магасерча ишколе баха лерхӏ артисташа, бутт чакхбоалаш - Эккажкъонгий-Юртарча №5, №4 йолча ишколашка, лайчилла бетта 27-ча дийнахьа - Заьзгакъонгий-Юртарча №26 йолча ишколе, 28-ча дийнахьа - Пхьилекъонгий-Юртарча №5 йолча ишколе.
Сурхо тӏарча №1 йолча ишколе кхоачаргья кхоллама тоабаш укх бетта 19-ча дийнахьа нийсса сахьат даьлча. «Дешархошта лаьрхӏа культура» яхача ерригача Россе программаца дӏахьош болх ба из.
