ЛаьрххӀача наькъаша гӀо дергда, хьунашка цӀераш ювргйоацаш
ГӀалгӀайчен хьун боахама лаьтташ тӀа дӀахьош ба, лаьрххӀа дола хьун наькъаш хьакхоллаш бола болх, яхаш, дийцр «Сердало» газетага ГӀалгӀай Республикан Ӏалама Министерстве.
«Уж наькъаш дохкаш хилара бахьан да, нагахьа санна хьунагӀа цӀи яьнна моттиг нийслойя, цига сиха машинашца тӀаваха йиш хургйолаш. ГӀалгӀай Республикан Шолжа кхале 2024 шера, цу тайпара хьун наькъаш дахка гӀерт 60 километр совгӀа. Из карарча шера паччахьалкхено хьалхашка оттадаь декхар да», - аьлар Ӏалам лорадераша.
Карарча хана, ГӀалгӀай Республикан Ӏалама Министерствонна чуйоагӀача Шолжерча хьунашкара цӀи йоаяра йолча центра болхлоша, говзанчаша бе лаьрхӀа хинна болх аханел дукхагӀа кхоачашбаь баьннаб.
Министр волча Хьулахой Саварбика белгалдир, тахан а хьалхагӀа санна хьунашка цӀи яьнна моттиг нийслойя, из йоаяра йола техника лелаеш я, из эца ваштӀехьадаьннад «Экологи» яха къаман проект хиларах.
