Мехкарча 3 эзар совгӏа дезалаша наьна капитал хьаийцар укх шера
Бер дарах нанна хьалуш долча ахчанга гӏолла, шоай вахара хьал тоаде аьттув баьлар укх шера 3000 совгӏа дезала. Мехкадаь зарбан болх лелабераша белгалдечох, ер шу доладелча денз, цу ахчах цхьацца хӏама де аьттув хилар 2842 дезала.
2000 совгӏа дезало хӏара беттара ахча хьаухаргдолаш болх чакхбаьккхар, 700 дезало ший вахара хьал тоадир, 74 дезало берий дешара дӏадахийтар из ахча, 12 дезал пенсионни оагӏонца хьаӏайнача ахчаца болх дӏахьош хилар.
Программага гӏолла хьаденна ахча 816 млн сом да. Дӏадахача шерара хьал теркалдича, укх шера 3135 дезало сертификатех ахча хьаийцар, 1, 17 млрд. да деррига хьаденна ахча. Цул совгӏа, таьрахьашцарча оагӏонца из болх чакхбаккха аьттув ба, итт денал дукхагӏа ха ца йоаеш. Вай мехкадас Келаматанаькъан Махьмуд-ӏаьлас тӏадиллад; цу оагӏонцара болх наха ма хулла аттачахьа баккха, аьнна.
«Цу оагӏонца дӏахьош бола болх сиха, ма хулла аттагӏа дӏабахьа аьттув хила беза наьха. Таьрахьашца дувзаденнарашка гӏолла, дӏабахьа йиш я из болх тахан итт денал дукхагӏа ха ца йоаеш. Цхьаккха новкъарле, кхоачамбоацар доацаш, ма хулла аттагӏа, дикагӏа дӏадодаш хила деза из гӏулакх», - белгалдир вай Мехкадас.
