Магасерча культуран хIама дегIакхувлара моттиге, Цисканаькъан Тамарай гойтам хургба
Лакха начIал долча суртанчан-сценографа, архитектора-проектировшика, Россе театральни болхлой Союза доакъашхочун Цисканаькъан Тамарай исбахьален гойтам боаржабергба Магасерча культуран хIама доаржадарах йолча моттиге, тов бетта ӏ-ча денгара 3-ча денга кхаччалца.
«Цига хьокха оттадергда къаман Iадатех дола ший тайпара кIувсаш, басарашца даьхка сурташ. Автора хIара болх къаман культураца, къаьнарча Iадаташца дувзаденнараш довзийташ ба. Кулгашца къахьегаш хьадаь кIувсаш къаьстта бIарг тIаотташ да. ХIара суртага, кIувса тIа оттаяьча белгалонга гIолла гIалгIай къаман вахар, кIоарга философи йовзийта хьежай Тамара. Кавказера тамашийна хоза Iалам, даьй вахар лорадеш лаьтта къаьнара, кура бовхьаш долаш, халонашта духьалъувтташ хьайоагIа гIалаш, Даьхенцара безам боарам боацаш боккха хилар гойташ я суртанча ший балхашца», - йоах «Сердалога» цу моттигера кхаьчача хоамо.
Цисканаькъан Тамарай къахьегам ший тайпара, моллагIча сага дог тохадолийташ, сомадоаккхаш болга теркалдаь дукха ха я. Архитектор-проектировщик хиларга хьежжа деррига боаггIача боараме дIа-хьа нийсде аьттув боал цун. Бокъонца дола дийна, цхьан юкъа сурт хинна чIоагIденна истори хет цун суртех. Лакха мах оттабеш, массане дегашка бужаш болх ба цо тахан къаман хIама доаржадеш дIахьор.
