Аьга-Кхала доазон тӀарча хин йистош цӀенйир
Цхьа пхийтта гали нувхаш гулйир ЖӀайрахьа-Эса-ЧӀожерча паччахьалкхен историко-архитектурни Ӏалама музея-заповедника болхлоша. Царца цхьана къахьегаш хилар, ГӀалгӀайчен лоамашкарча Аьга-Кхалан гӀалаш йолча доазон тӀара культуран тӀехьале лораеча моттигерча паччахьалкхен комитета викалаш. ХӀанз Эсах хьакхеташ дола Аьгий-хий цӀенделар, укхаза хӀама бе-башха доацача туристаша Ӏокхийсача нувхех.
«Оаха баь белхий хетабаь бар Халкъашта юкъерча исторически моттигий денна, цунна кертте латта дешаш да: «Лорабергба вай исторически мохк». Тхо тешаш да, дукхагӀа болча наьха а иштта вай Ӏаьдала оагӀорахьара а; оаха хьийга къа терко йоацаш дусаргдац, аьнна. Иштта лорае езаш я культуран тӀехьаленца ювзаенна моттигаш», - аьлар «Сердало» газетага цу кхетачен доакъашхоша.
Исторически моттигий Халкъашта юкъера ди белгалдеш да, хӀара шера бекарга бетта 18-ча дийнахьа. Из чӀоагӀдаьд 1982 шера ЮНЕСКО чуйоагӀаш хиннача Халкъашта юкъерча Ассамблейс. Культуран тӀехьале, исторен дагалоаттама моттигаш лораяра тӀахьехаш да из ди.
