Гӏалгӏайчен ИЗО Госмузее дешархошта унахцӏенон урок елар
Гӏалгӏайчен исбахьален искусствай музее «Нийса оамалаш хьакхоллар» яхача темах ӏомалуш урок хилар. Цу кхетачен доакъашхой бар Илдарха-Гӏалан №3 йолча ишкола дешархой, из дӏайихьар хьехархочо-психолога Татенаькъан Заремас.
«Из кхетаче дӏаяхьара маӏан дар, кхувш боагӏарашта наркоманеца дувзаденна хьал унзара хилар хьалхадаккхар, шоай могашал лораяра, вахара нийса никъ дӏахьош хилара уж тӏахьехар. Къамаьл деш, дешархошта довзийтар вахара мах лакха хилар. Цар дийцар сага могашала, цун физически хьала, дӏахо хургдолча вахара, цар дешара ӏаткъаш долга, ийрча никъ лелабеш хилар», - аьлар «Сердало» газетага музея зарбан болх лелабераша.
Къаьстта терко тӏаяхийтар - наркотикаш лелаяр, гӏаьле озар санна йола во оамалаш юкъера дӏаяхара. Заремас хоадам боллаш дийцар кхувш йоагӏача тӏехьен во оамалаш хилча, из царна шоашта ӏаткъаш хиларал совгӏа, царна гонахьарча наха, цӏагӏарча гаргарча наха цох зе доалаш хилар. Психолога къаьстта терко тӏаяхийтар, дика-во къоастадеш уж хилара. Берашта ӏомадир, шоай нийсархой оагӏорахьара шоашта ӏоткъам беш хилча, мишта юстардала деза цох, царга из деррига ийрча гӏулакх дезаш «дац» алар хоадам болаш хила дезилга хьалхадаьккхар.
Юххера а, кхетаче чакхйоалаш, берашта дӏадийцар, хӏара денна физически боарам лорабеш, дикагӏа бола кхача буаш, дегӏадара тӏакхувш, дикача нахаца гӏулакх леладеш хила дезилга.
Кхетаче дӏахьош хиннача Пхьиленаькъан Луизас белгалдир, кагирхошта кхетам балар, царна из хьал довзийтар музея керттера декхар долга. Цо яхачох, уж даим кийча ба могашал йола тӏехье кхеяра новкъостал де.
