Гӏаьбартой-Балкхарой байтанчанна хетаяь кхетаче хилар вай мехкарча НИИ
Цӏихезача балкхарой байтанчанна, Зумакулов Мустафай Танзилайна хетаяь литературан кхетаче дӏахьош хилар, вай мехкарча ӏилма-тохкама институте. Кхетаче гулбелар хьехархой, ӏилманхой, литератураца къахьегараш, иштта йоккхача байтанчан кхоллама низ безаш, лоархӏаш мел бола вай мехкара, Гӏаьбартой-Балкхарой мехкара нах.
«Кхетаче дӏайолаеш, къамаьл дир мехкарча НИИ хьалхалаттача Оздой Джамбулата. Ший къамаьла юкъе цо белгалдир, культурага, литературага гӏолла Россе дахача къамашта юкъера бувзам чӏоагӏбар. Къамаш цхьоагӏо, вӏаший барт болаш дахаш хуле, моллагӏа гӏулакхаш а цхьана кхоачашде аттагӏа хургдолга теркалдир кхетаче», - хоам бу «Сердало» газетага НИИ зарбан болх лелабераша.
Кхетачен доакъашхоша дийцар, гӏалгӏай, балкхарой шин къаман юкъе массахана вошал, барт хиларах. Зумакулова Танзилай цхьайола байташ гӏалгӏай меттала яьха, вай къаман наха езаенна я. Къилбаседа Кавказа моттигашка цун байташ йоаржаеш болх лоаттабарах, литературера цун боккха никъ хьаллацарах дийцар семинаре дакъа лоацаш хиннараша. Литературага гӏолла дукха хӏама де йиш я сага; адамашта юкъе хозадар, дикадар доаржадеш.
