63 км йола тока оагIув тоаеш хилар мехка
Гуйран-Iан кийчо еш дола тока оагIонцара балхаш дIахьош ба мехка. Укх наькъа 63 км йолча тока оагIонна хувцамаш деш хилар «Къилбаседа Кавказа Россеташ» - «Ингушэнерго» филиала болхлой.
44, 6 км бола къаьнара, тишбенна тока саьрг толашагIа болчунца хийцар. Цул совг1а, 316 керда тока бIоагIий дегIар, 4 эзар совг1а бIоагIаш тIара пелаш хийцар, 30 га доазон тIара наькъаш цIендир.
Эггара лоархIамегIа ярех яр «Дарьял-Пхьилекъонгий-Юрт» яха 110 кв йола тока моттиг. 50 эзар совг1а болча Илдарха-ГIалий тIарча, Наьсарерча, иштта лоалаха ядача юрташкарча бахархошта ток лоаттаеш йола лини я из. 786 бIоагIа тIара пелаш хийца, 105 оалхазараш лорадеш дола гIирсаш оттадир цига. 8, 5 км болх чакхбаккха беза кхы а. Цу гIулакха лаьрхIа хьакъоастадаьр 249 млн сом ахча да.
ДIадахача шера хинначул 6% дукхагIа хул из. «Ток боаггIача боараме хиларо наьха вахара хьал аттачахьа доаккх. Къаьстта Iан хана, дукха низ тIалаттача тока оагIонца кхоачамбоацараш цахилар лоархIаме да», - белгалдир вай Мехкадас.
Келаматанаькъан Махьмуд-Iаьлас аьнначох, тахан хьакимаша боккха болх дIахьош латт, цу оагIонцара болх тоабе г1ерташ.
