Гӏалгӏайче гойтар ше морг кхы йоаца Гӏазакханаькъан Берснакъий мехктохкама архив
Гӏалгӏай мотт ӏомабара, дегӏабоалабара, гӏалгӏай метта, литературан Центре; ше морг кхы йоацача архива гойтам дӏабихьар, из гулбир цӏихезача мехктохкамхочо Гӏазакханаькъан Берснакъа гулдаьрий кӏийлен тӏа. Из гойтам хетабир цӏихеза тохкамхо ваь ди хилара, цун даьлар 72 шу.
«Экспозицена чудоагӏаш да тамашийна дика, тохкамхочун корадаь балхаш. Царна юкъе да бӏаь шу дукхагӏа ха йола гӏалгӏай кхера биллар; иштта ХVӏӏ бӏаьшере чакхйоалаш яьча гӏалай, сийленгий сурташ. Гойтаме я хьалхаръяраш санна, керда тохкамаш даьчара материалаш а.
50 шу совгӏа ха я Гӏазакханаькъан Берснакъа гӏалгӏа къаман исторех дола каьхаташ гулду. Хьамсарча мехка дӏаяхача ханара вахара хьал довза безам болаш из хилар 15 шу даьлча, 1968 шера денз цо болх бу архивашка, иштта тайп-тайпарча мехкашкарча библиотекашка, бӏаьзза вахав из кхыча мехкашка, лаьрххӏа уж балхаш деш, цо хьакхеллай хургдолча тохкамий мах бола кӏийле», - аьлар «Сердало» газетага Гӏалгӏайчен Паччахьалкхене.
Гойтаме керттера моттиг дӏалоацаш да къаьнара графически сурташ. Таханарча денга кхоачаш, цу тӏа дика гуш йола Дзовранаькъан гӏала еррига а хаьрцай. Немций суртанчас гойташ йола гӏала таханарча денга кхаччалца вӏалла мичай ховш яц. Гойтаме иштта я юкъерча бӏаьшерений элгаца Тхаба-Ерда материалаш, цу юкъе я гуржий говзанчий графика, немций тохкамхой гӏирсаш.
Гӏазакханаькъан Берснакъий мах бола архив шийна чулоацаш я юкъерча бӏаьшерений дохадаь сийленгаш, уж хьакхеллад гӏалгӏай дӏаяхача заман къоаноша. Тахан уж кхелахой юкъарлонна чӏоагӏа эшаш да.
