Хий цӀендеча моттигера болх йиллача ханал хьалха чакхбала мегаш ба
БӀеха хиш цӀендарах йола моттигаш хьалъеш, болх ба мехка дӀахьош. Таханарча дийнахьа 48,8%-га кхоачаш кийча я из проект. Йиллача ханага диллача, 5% лакхагӀа хул из. Цу гӀулакхо хьагойт, оттаяь хиннача ханал кхо бутт хьалхагӀа из болх чакхбаргболга. «Сердалога» из хоам бир мехкадаь зарбан болх лелабераша.
Массехк оагӀонцара балхаш чакхдаьхад, ер шу доладелча денз. Хица, канализацеца, тока оагӀонца дувзаденнараш кхоачашде гӀерташ боахк цига карарча хана.
20 км кхоачаш хургья канализаце коллектор. Белгалде деза, из моттиг Шолжа-Шахьарца, Илдарха-ГӀалийца, Эбарга-Юртаца дувзаденна кхоачамбоацараш меттадоаладеш хургйолга.
Вай мехкадас Келаматанаькъан Махьмуд-Ӏаьлас белгалдир, цу проекто кхаь моттигерча бахархой хьал аттача доаккхаргхилар.
«Кердача моттига меттадоаладергда Илдарха-ГӀалий тӀара, Шолжа-Шахьарера, Эбарга-Юртара экологе хьалаца дувзаденнараш, иштта хин хьал», - аьлар Мехкадас.
Иштта республикан Кулгалхочо хьоахадир, из моттиг ший ханнахьа болх бе йолалургйолга. 5,1 млрд сом ахча дӀалоацаш йолча моттига болх 2022-2027 шераш чулоацаш ба.
