Керда берий беш хьалйир ТӀой-Юрта
2018-ча шера хьалъе йолаяь берий беш кийча я ТӀой-Юрта. Сеца лаьтта болх юха дӀаболабир дӀадахача шера, вай мехкадас Келаматанаькъан Махьмуд-Ӏаьлас тӀадилларах.
220 бера моттигаш луш йола берий беш 100%-га кхоачаш кийча я. Ер шу йистедалале, хьалхара хьаьший тӀаэцаш, ший наӀараш хьаелла езаш я из.
«Из болх дӀатӀаийцача болхлочо ший декхараш боаггӀача боараме, бехктокхаме кхоачашцадарах; бӀарчча 6 шера хьийжаб юртахой из берий беш хьаелларга.
ЦӀаьхха, цӀерцара хатар хуле, эшаш йола аьшка наӀараш йоацаш, дукха кхыдола кхоачамбоацараш юкъе долаш, ков чудерзаданза, чура балхаш йистедаханза дар цига», - белгалдир вай Мехкадас. 5 648, 5 кв.м йолча берий беша тахан мел эшаш бола кхоачам ба берашта паргӀатта ха яккха. ЦӀи яьлча хоам беш дола гӀирсаш, видеотӀахьожам оттабаьб цига.
