Наьсаре къоастае лерхӀ, транспорт дӀаоттаю керда моттиг
Укх деношка Наьсарен кулгалхочо Оздой Руслана, ЦАО кулгалхочунца Шутуранаькъан Ахьмадаца, керттерча архитекторца ЦӀечой Мухьмад-Басираца гӀишлошка хьожаш болх дӀабихьар, цига карарча хана доазув тоадеш дола балхаш деш да, яхаш, дийцар шахьара администраце зарбан болх лелабераша.
Ӏаьдала викалаш шахьара Ӏама даькъ тӀа бахар, «ЗӀамагӀа йола шахьараш, исторически моттигаш» яхача Ерригроссийски яхьанна чудоагӀаш, балхаш деш да цига.
ДӀахо уж хьежар Базорканаькъан проспекта тӀа дӀахьоча балхага. Укхаза, Сбербанка юххе, шахьара кулгалхочо транспорт Ӏооттаяра моттиг е аьнна тӀадиллар.
«Сона хетаргахьа, бархӀ машина укхаза дӀаооталургья», - аьлар Оздой Руслана.
Цигара бетона лагӀаш укх массехк шера наха новкъа дар. Ара шелал эттача, лоа Ӏодиллача уж лагӀаш гӀора а дийя, цар тӀагӀолла наха хьал-Ӏо бала хала дар, Ӏолегар кхераш, никъ боацача моттиге гӀолла болхар уж. Цига наха аттагӀа хургдола наькъа такилг дулларгда. Тешаш хургда вай еррига халонаш тӀехьаюсаргхиларах.
