ГӏалгӀайчен Парламенто йийцар 2026-2028 шерашкара бюджет
ГӏалгӀайчен Парламенто ладийгӏар 2026 шерарча, иштта цун тӀехьа латтача 2027, 2028 шерашкарча республикан бюджетага. Кхетаче дӀайихьар ГӏалгӀай Республикан Халкъа Гуллама йоала, бюджета комитета кулгалхочо Дебаранаькъан Мухьмад- Сале.
Ше къамаьл деш, цо белагалдир, бюджет вӀашагӀъелла хилар паччахьалкхен программаш юкъелоацаш, республикан Ӏаьдала деррига керттера балха доакъаош чулоацаш.
ГӏалгӀай Республикан финансай министра декхараш кхоачашдеш волча, Паччахьалкхен Кулгалхочун гӀончас Вешкаранаькъан Темарлана гойтар хьачудоагӏа, дӀадода бюджета рузкъа. ДукхагӀча даькъе, 2026 шера хьачудоагӏар да 41 млрд 910 млн 837 эзар. сом, хӀаьта дӀадодар да 42 млрд 784 млн 685,4 эзар сом. Йоала даькъ тӀара хьатӀабоагӀача пайдан хьал дийцача, организацешкара хьадоагӀар цу шера хул 573 млн 442 эзар сом.
Керттера терко тӏаяхийтар дӀадодачун даькъ тӀарча вахара политиканна. Бюджетера ахча дӀадохийтаргда вахара декхараш кхоачашде, унахцӀено дегӀайоалае, наькъаш, дешара моттигаш хьалъе.
Ладувгӏаш хиннараша белгалдир, хьа тӀадоагӀача шера керттера декхараш кхоачашдергхилар ГӏалгӀайчен бюджета а йоала политикан а. Вешкаранаькъан Темарлана иштта аьлар закона проекта чудоагӀаш хургда хувцамаш, хьакхоачача хьалашка хьежжа. Дебаранаькъан Мухьмад-Сале тӀатехар, бюджет хувцалуш хила йиш я, федеральни бюджетера хьадоагӀа ахча хувцалуш хиларца.
