Гӏалгӏай парламенто тӏахьийхар, мах бола шира хӏамаш къайлагӏа йохкар соцадара
Гӏалгӏайчен Халкъа Гуллама Председатела Тӏумхой Мухьмада мехка культуран тӏехьален моттигаш лораяра паччахьалкхен Комитета кулгалхочунца Коазой Темарланаца балха кхетаче дӏайихьар. Цига дакъа лоацаш хилар Халкъа Гуллама депутат Цхьорой Къурейш, из ва культуран тӏехьален моттигаш лораяра паччахьалкхен Комитета чуйоагӏача Юкъарча кхела кулгалхо. Керттера дийца дош дар мах бола шира хӏамаш Россе кхыча моттигашка къайлагӏа йохкаш хилар юхатохар, цу гӏулакхо меттаоттаде йиш йоацаш дола зе ду Гӏалгӏайчен культуранна.
«Цун бахьан дар бувзама оагӏонашка гойта хинна сюжет, цу тӏа Дола-Коа бахача наха мах бола, эзар гаргга исторически шира хӏамаш дӏаенна хилар Нохчий Республикан музее. Уж я тайп-тайпарча исторически ханашка дошох, дотох, ингалех яь хӏамаш. Цу юкъе да тайп-тайпара герз, къахьегама гӏирсаш, кхыдараш.
Коазой Темарлана яхачох, говзанчаш тохкаш ба сийленгашка дӏахьош дола оахкалаш, уж дӏадахьара хьал мишта нисденнад, цу юкъе Магӏалбика кхален Дола-Коарча даькъ тӏара археологе моттигаш а. Из болх къайлагӏа цу даькъ тӏа къоал деш вар малав хара дӏахьош ба», - аьлар «Сердало» газетага Халкъа Гулламе.
Гӏалгӏайчен законаш хьакхоллача моттиго белгалдир, из бокъонах де йиш йоацилга. Цо тӏахьийхар массайола ӏаьдала оагӏонаш цу гӏулакха тӏахьожам лоаттабара. «Историко-культуран тӏехьале лораяр- из паччахьалкхен декхар хинна ӏац, из хӏара сага бехктокхам ба. Из хаттар лаьрххӏа тӏахьожам болаш хургда депутатий оагӏорахьара», - аьлар Халкъа Гуллама спикера.
