Шолжа-Шахьарера керттера парк тоаяь яла дукха ха йисаяц
15.07.2025 13:59
Шолжа-Шахьарера парк тоаеш боахк болхлой. Укх шерарча бӀаьстан хьалхарча бетта денз, тоаеш латтача моттига болх мичахьа кхаьчаб хьажа ваха хилар шахьара да Ӏумаранаькъан Аслан, цун гӀонча вола Беканаькъан Халид. Болх йистебаьнна бала боалл. Шахьара администраце бу «Сердалога» из хоам.
Керда бай хургболча лаьрххӀа кӀийле тоаеш боахк цига карарча хана. Сийленга Ӏоакъаш хийца, кхера Ӏобилла, кхуркхолг оттабаь, къахьийгад цига. Керда гӀандаш, фонараш, нувхашта лаьрхӀа яьшкаш оттаергья парке, деррига доазув баьццардерзадергда. ХьатӀабоагӀача бетта деношка, деррига балхаш чакхдаьнна, хьаелла мег парк бахархошта.
