ЦӀи ялара кхерам болаш йӀовхал латтарах, бахархой гӀулакхашта сунт техад
ЙӀовхал этта хиларах, цӀи ялара кхерам лакхлуш боагӀа, къаьстта МагӀалбика кхален доазон тӀа 5 классага кхаьчаб из, цудухьа республике гӀолла наха цхьацца боарамаш белгалдаьд, яхаш, дийцар «Сердало» газетага ГӀалгӀай Республикан Ӏалама Министерстве.
Хьун моттигашка цӀераш ювза бокъо луц, цига даар кийчде а хьашт дац. Иштта йокъаенна йоархӀаш летае йиш яц. Цул совгӀа, бахархой тӀахьех хӀаман хьисап долаш хилара: гӀаьлен юхкаш машиний корех ара ца кхувсара, миччахьа дӀакхаьчача уж Ӏо ца кхувсара, дӀайоаянза йола гӀаьле а цӀилеторгаш а лораеш хилара.
«Уж бокъонаш йӀовхал латтача юкъа лораеш ца хуле, гӀод тоха лаьрхӀад: физически сага - 4 эзар сомагара 5 эзар сомага кхаччалца; юридически сага - 300 - 500 эзар сомага кхаччалца; гӀалукхерча сага - 20 - 40 эзар сомага кхаччалца.
Нагахьа санна цӀи яларах доккха зе хинна моттиг нийслой, е саг венна хуле, уголовни бехктокхаме озаргва», - аьлар ГӀалгӀайчен Ӏалам лорадераша.
