38 моттигера проект кхоачашъе лерхӀ республике, 2030-гӀа шу тӀакхачале
12 къаман проекта юкъера 38 моттигера проекта йоаржаеш болх дӀаболабаьб вай мехка. Из хоам «Сердалога» бу Мехкадаь зарбан болх лелабераша.
Карарча шергара дӀахододача ялх шера республике йоаржае лерхӀ «Кадай, дӀаьха вахар», «Кадраш», «Кагархойи бераши», «Туризм, хьаьша тӀаэцар» яха, иштта кхыйола дукха проекташ. Вай мехкара вахара хьал тоадеш, экологен гӀулакх меттадоаладеш, технологецара хӀама лакхдеш, экспорт тоаеш хургья уж еррига проекташ.
«2019-ча, 2024-ча шерашка йолаяьча проектай болх дӀахо дӀахьош хургья РФ Президента соцамца тахан юкъеяьхараш. Вай республикан хьал дикка тоадеш хила еза уж», - белгалдир вай мехкадас Келаматанаькъан Махьмуд-Ӏаьлас.
Республикан кулгалхочо хьоахадир, къаман проектага гӀолла тоаде йиш мел яр республике кхоачашде лерхӀилга. Мехкадас белгалдечох, мехкара вахара-экономикан хьал тоадеш хургба из боккха болх.
