Мехка Паччахьалкхен кулгалхочун хьалхара г1онча Йовлой Мухьмад ший моттиге висав. Мехкадаь амарах цун кхы а виъ гӀонча оттаваьв. Иштта шоай моттигашка дӀахо болх бе бисаб вахара оагӀонга хьожаш йола Саганаькъан Индира, дукха ха йоацаш Паччахьалкхен кулгалхочун гӀонча хержа Балахой Микаил.

Керда ши вице-премьер ва: экономикаца, рузкъанца дувзаденна гӀулакхаш Зурабанаькъан Ювсапа тӀалаттаргда; кхерамзленца дувзаденнараш - хьалха Мехкадаь гӀонча хиннача Антонов Игора.

УнахцӀенон гӀулакхех йолча Министерствонна кулгалде оттайир Ӏалбаканаькъан Зара; промышленностах, мах барах йолча Министерствонна кулгал дергда Кокурхой Адама; экономикан хьал доаржадарах йолча Министерствонна кулгалде хержар Гиренаькъан Исроапил; регионерча МЧС хьалха латтаргва Йовлой Александр. Кхыбола кулгалхой шоай моттигашка къахьега бисаб. «Пхе шера баьча балхах баркал ала лов сона Паччахьалкхенна. Дуккхача халонашта духьалъувтташ хьабера вай из никъ. Дукха декхараш, йоала ийдаь ахча тӀалатташ ханаш яр уж.

Иштта малхбузерча экономикаца ювзаеннача санкцеша деррига хувца дезача оттадир вай. Экономика хувца, арахьара хьачукхихьачун меттел моттигера хӀама дӀаоттаде аьттув баьлар вай!

Промышленность, туризм, юртбоахамца дувзаденнараш дикка доаржаде низ хилар. Къаьстта уж оагӀонаш дикка дегӀайоагӀаш латт вай мехка тӀеххьарча шерашка», - белгалдир Келаматанаькъан Махьмуд-Ӏаьлас кабмино дӀабихьача балхах дувцаш.