Вай мехкара инфляци айеннай, амма из лохагӀа я Россе юкъарчул
Вай мехкара инфляци 2024-ча шерарча ахкан тӀехьарча бетта 9,1%-га кхоачаш айелар, цул хьалхарча бетта 8,2% тӀа лаьттачара. Россе, СКФО латтачул лохагӀа я из. «Сердало» газетага из хоам бир ГУ Россе Банка чуйоагӀача республикерча Къаман банка зарбан болх лелабераша.
«Ахкан хьалхарча бетта хинначул, кӀезигагӀа доаккхаш хулар хаьсех ахкан шоллагӀча бетта; бакъда укх шера дукха хоалуш хиланзар из гӀулакх. Юртбоахама моттигашка дӀадувча ялатах, царна тохача молхах дӀадода ахча лакхделар; хӀаьта ГӀибухерча Россе укх шерара ахка сов дӀайха хиларах, хаьса сомаш ма хетта дика хиннабац.
Цунга хьежжа, нарсий, помидорий, коартолий мах лохлуш бац, хоха мах Ӏо ца балар а дикка гаьнадаьннад. Цхьайолча кхача арахецача моттигашка болхлой тоъаш хилацар укх шера, цунга хьежжа, болча болхлошта телаш дола ахча лакхде дезаш хилар. Бутт хьалха хинначул езагӀа я шура, шурах хьабаь кхача», - йоах хоамо.
Иштта массане теркалдеш да, машинашка чудувттача доагора мах лакхбеннилга. Цу тайпара латт кхыйола тайп-тайпара хӀамаш арехацача моттигашкара гӀулакх а.
Барзкъий, молхай, кӀадах хьаеш мел йолча хӀамай маьхаш айденнад. ЖКХ оагӀонца дувзаденнарашцара хьал а иштта латт, 2022-ча шера Ӏан хьалхарча бетта денз. ГӀишлон мах айбаларга хьежжа, лакхденнад цхьа ха яккха лоацача квартирах тела дезар.
