Наьсаре тоаеш я культуран керттера моттиг
Наьсаре цӏхаштта тоадеш латт культуран Цӏа. Гӏишло тоае йолайир дӏадахача шера маьтсела бетта. Балхаш дӏахьош да «Дезал» яхача къаман проектах, Россе Президента Путин Владимира хьаллоацаш. Хувцамаш дара гӏулакха тӏахьожаш ба Гӏалгӏайчен культуран, туризма министр Лаьнанаькъан Залина, цун гӏонча Малсаганаькъан Хьажбикар.
«Укх ханашка кхоачаш къаьнара ийнаш, отоплени, канализаци, хий лоаттаду моттиг тоаеш я. Хӏанз говзанчаш цӏи яларах хоам беш йола моттиг чуюллаш, пенашца къахьегаш ба. Из гӏишло тӏадоагӏача шера дӏачуяла лаьрхӏад», - аьлар «Сердало» газетага культуран, туризма министерствон зарбан болх лелабераша.
Культуран Цӏа да шахьара цӏай дӏахьош йола керттера моттиг, цу чу кхоллама тоабаш, берашта тӏехьара тӏа хьехара болх, репитицеш дӏахьу.
Гӏалгӏайчен кулгалхочо Келаматанаькъан Махьмуд-Ӏаьлас хьалха ма аллара, ДК кердадаккхар чудоагӏаш да гонахьара доазув тоадеш - шахьара ӏам тоабеш, ӏама йистош шеръеш, иштта Малсаганаькъан Кӏарцхала цӏерагӏа парк кердайоаккхаш хилара. Цо таро лу наьсархошта, хьаьшашта салаӏара йола вай заман дика моттиг хьакхолла.
