«Цхьана инвестицей проекташ хьаллоацаш, цхьацца хӀама хьачудахьача хана вӀаший дагабоалаш, хӀама арахецаш йолча моттигашта юкъера бувзам чӀоагӀбеш, къахьега лерхӀ шин оагӀоно. Промышленни оагӀув хьаийцача, керда хьадаьннараш, технологеш дӀа-хьа эцаш болх дӀахьоргба, иштта теркаме лаьцар унахцӀенон оагӀонца дувзаденнараш а.

Цхьана тохкама балхаш дӀакхахьа, молхаш хьачуийяра гӀулакх дикка тоаде, дарбанчешка эшаш болча кхоачамга хьажа лаьрхӀад республикаша. Дешара оагӀонца а пайдане хургда аьнна хетараш дӀа-хьа эцаш, цхьана тохкама балхаш дӀакхухьаш, керда программаш йоаржаеш, студенташ дӀа-хьа ухийташ, бувзам лелабергба», - язду Мехкадас ший Телеграм-оагӀон тӀа.

Иштта цхьана гойтамаш дӀакхухьаш, кхоллама тоабаш дӀа-хьа йолхаш, музейшца ювзаенна проекташ йоаржаеш, болх бергба; туризма оагӀонцара бувзам а дикка чӀоагӀбе лерхӀ. Таьрахьий, ӀT-оагӀонца дувзаденнарий а лаьрхӀа моттиг хургья. «Электронни паччахьалкхе» хьакхоллача наькъ тӀа къахьегаргда регионаша, цхьана ӀT-кхетаченаш дӀакхухьаргья. 

Келаматанаькъан Махьмуд-Ӏаьлас белгалдир, Татрий мехкацара бувзам, чӀоагӀа вайна пайда беш, беркат доаржадеш хургда, аьнна. Еррига проекташ, Даьла къахетамца, дийнъергья; лаьрхӀар кхоачашде дикка къахьегаргда шинна оагӀоно. ВӀаший яь чӀоагӀо боаггӀача боараме терко, тӀахьожам беш дӀахьоргйола тоабаш вӀашагӀъехкай, Татарстана оагӀорахьара - промышленностах, хӀама йохкарах, эцарах долча гӀулакхий Министерство; вайгахьара - экономикаца дувзаденнача гӀулакхех йола Министерство.

Болх, ца говш, дӀаболабе лерхӀ шинна оагӀоно.