Керда къаман проект йоаржаеча дакъа лоацаш хургья вай республика
«Вахар латта доакъош» яхача къаман проектанна чуйолхаш хургья наьха вахара хьал тоадарах йола паччахьалкхен программаш чулоаца 8 федеральни проект. «Сердало» газетага Мехкадаь, Паччахьалкхен зарбан болх лелабераша яхачох, керда къаман проект йоаржаяр вай республикан чӀоагӀа лоархӀаме да, хӀана аьлча цунга гӀолла йоаржаергья кхыйола программаш.
Тахан ювцараш я, харцар кхерам болча цӀеношкара нах кхычахьа дӀачубахийтарах, керда гӀишлош хьалъярах, шахьара моттигаш тоаярах, ЖКХ оагӀонца дувзаденнараш тоадарах йола проекташ. Къаман проекте чудодаш хургда машиний наькъаш тоадар. Наькъий гӀулакхех йолча министерствос къоастадеш латт кердача къаман проектага гӀолла тоадергдола наькъаш.
«Бахархой вахара хьал дикка тоадеш хургья керда къаман проект. Цу проекта чуйолхаш йола федеральни проекташ шахьара моттигий куц эргадоаккхаш, ЖКХ оагӀонца дувзаденнараш тоадеш, иштта кхыдола лоархӀаме балхаш дӀахьош хургья. Мехкарча бахархой вахара хьал тоадеш хургда из деррига», - аьлар вай Мехкадас Келаматанаькъан Махьмуд-Ӏаьлас.
