Энергокомпане гуча боах йоагаяьча светах шоашка доалла декхар Iаьдала дIа ца луш багIа нах. Цудухьа еш я тIатеIIа цу тайпара рейдаш. Из дуккха милионаш ахчаш да, шоашта свет хилийтара чIоагIо луш йолча компанена цу наха дIадала дезаш. Республике свет йоагаеча наха январь-февраль бетта Iаьдала дIачуденнар 63% мара ахча дац. Бакъда кхы а хьадала дезаш диссар 172 млн сом да. Юкъера хьаийцача деррига а вай мехка гIолла 4,8 млрд сом декхар да.
Энергетикаш Магасе гIолла рейд йир. Бахархоша эггIара лохагIа бола боарам гойт, декхар Iаьдала дIадалара хьаькъехьа. Из да - 28.5 % ер шу дIадоладелча денз компанена хьаденнача ахчанга хьежача. Деррига доаллаш дола декхар 282 млн сом да, царех 173 млн сом бахача нахага доал.
Йоагаяьча светах дола ахча хьадехаш дIахьош хиннача мероприяте дакъа лаца бийхар Магасерча района света бувзама (РЭС) викалаша НТРК «ГIалгIайче» съемочни тоаба. Тоаба теркама юкъе хиннар яр Озиева улицах №2 йола цIа. Укхаза баха нах 90 эзар сом ахча хьадала дезаш бар. Светага хьежараш а журналисташ а эггара ахча хьадалара халагIа лоархIаш болча 25 сага адресах чуэттар. Цу тайпара бархI квартирера свет дIайоайир.
Цар белгал а даьккха халагIчарех лоархIаш да (МКД) дукхача квартирай цIа-укхаза саг цIагIа волаш тIакхачар чIоагIа тамашийна хIама лоархI, хIана аьлча царна ховш да шоаш декхар доаллаш болга, цудухьа уж дIакъайла бувл рейда боагIача нахах. Бакъда рейда болхлоша белгалду, хIанзачул тIехьагIа никъ къейла лачкъа багIа кхы таро хургъяц цар. МКД декхарийла болча нахаца точечни свет дIайоаеш бола болх дIабахьа лаьрхIад. Шин бетта совгIа дола декхар хьаьрча багIача наха чуувтташ, шоашкара юха свет чуйиллараш бий хьожаш къахьегаргда болхлоша.
Дехар ду нахага Iоа ца деш шоай ханнахьа светах дола ахча дIалуш хилара,-аьнна белгалду Магасерча РЭС кулгалхочун заместитела Цычаев ИбрахIама. Нагахьа санна цхьацца долча бахьанех из саго йоагаяьча светах ахча дIадала безам болаш веце, из къайла кхахьа дезаш, хIана аьлча из къейла а гIоргдац. Цар шоай доазон тIарча светах йолча отделене дIа а баха шоай декхар дIадаккхара дола договор оттадой, тхо гIад а даха царна накъа гIоргда.
«Къилбаседа Кавказ Россети» Филиала - «Ингушэнерго» тIахьех шоай ханнахьа йоагаяьча светах ахча дIалуш хилара. Из «Къилбаседа Кавказ Россети» сайта тIа лични кабинете дIадала йиш йолаш да, иштта клиентий хьашташ кхоачашдара йолча Центрашка е почтови отделенешка а бу из болх, иштта из ахча дIадала йиш я «Сбербанк Онлайн» йолча системах.
Нахага доаллаш дола светах хьаьрча ахча хьадоаккхаш компане беш бола болх къаьстта наха лаьрхIа беш ба, хана цар декхар хьалуш хиларах тийша да царна свет ший йоаггIача хана а эшшача боараме а хилийтара. Цхьабола нах бекхтокхаме ца хилар бахьан долаш цу компане довш дар а кIезига дац, электросетеш леладара, кхыйола оборудовани ший эшача бесса тоаяь хилара компане дIадодар дукхагIа хул аьнна белгалдир «Энергосбыт» отделене директор волча Булгучанаькъан Батыра.
Иштта чоалхане берз энергетикай болх, бехктокхаме боацача наха беш бола тийша болх бахьан долаш. Цунга хьажжа мара хила йиш яц компане балха дикал а.
