ГӀалгӀайчен СВО доакъашхошта; техника, лаьрххӀа бола кхоачам бахьийтар
ГӀалгӀайчен бахархой, массайолча хана хиннача беса, Даьхен лорбой ба. Тахан СВО доакъашхой цӀераш тӀайолча сийлен дагалоаттама мемориалера дукхатехника, тӀабувхабу гӀирс, кхачан продукташ яхьийтар, яхаш, дийцар «Сердало» газетага из новкъостал вӀашагӀделлараша.
«Болам дӀабихьар РФ Паччахьалкхен Думан депутата, республикан СВО доакъашхой хаттарех йолча балха тоабан кулгалхочун БӀарахой Бек-хана новкъосталца. Иштта цига дакъа лоацаш хилар «ЦаӀ йолча Россе» ВПП ЦИКа кулгалхо Сидякин Александр, ГӀалгӀай Республикан парламента кулгалхо ТӀумхой Мухьмад, «ЦаӀ йолча Россе» ВПП ЦИКа наьха хьашташ довзара йолча урхаллен кулгалхо Рябцев Александр, тӀема ветеранаш, герзашцарча низий тӀема гӀулакх леладераш, лаьрххӀа дола тӀема доакъош», - йоах хоамо.
Россе оборона министерствон, Росгварде цхьаболча бӀухошта делар, миччахьа гӀолла чакхйоалаш йолча 18 машина дӀоагӀаш. ТӀема хьалашка Даьхе лораеш латтача бӀухошта «Ниваш», пикап, УАЗ машинаша дика новкъостал дергда, уж хилча цхьаккха ха ца йоаеш, российски бӀухой тӀема мугӀарашка баргба.
Цул совгӀа, российски бӀухой технически хьал-таро совъяргья, керда техника, тӀема гӀирс, кхачан продукташ, цӀенонна эша гӀирс хилча. Из деррига дӀахьоргда эшача моттиге, йоккхача кхаь машинаца.
