Царна юкъе бар машина каьхаташ доацараш, виъ саг араваьннав машина кораш тӀара плёнка Ӏо ца йоаккхаш, ворхӀ саг ва хатар хилча лоравеш дола батхар хьа ца тохаш, теха гӀод ханнахьа дӀатекхадац 3 сага, цхьаккха тайпара дӀаязъяь йоаца машинаш хехкаш лийннав кхы а массехк саг… Сагота боацаш лелараша, наькъашка оттаяь бокъонаш теркалъе безам боацараша хьаду хатараш.

Вай мехка каст-каста хул кӀалха ша болаш, халла мара хӀама ца гуш, дохк латта хаоттам. Ӏан хана лелаеш йола чархаш дӀаоттаяьй цхьанне; бакъда гонахьара кораш баьддаь араваьннав. ХӀаьта догӀа доагӀаш, лоа делхаш ха хилча; корашта хьатӀалетача лайво, догӀан тӀадамаша арара хӀама боаггӀача боараме хоадалийтац хӀама тӀалотаяь баьддаь хилча. Цудухьа Ӏойоахийт царга из ГИБДД болхлоша, цар бӀаргаш мукъадаха, гонахьара сурт зийта.

Геттара лоархӀаме да наькъашка машинаца воагӀар сабаре хилар. Цхьайолча моттигашка геттара корзагӀдоалаш, сихлуш оамал йолаш да вай. Балха, хьоашалгӀа, чукхача сиха долаш хул вай. Шолжа шахьарера Магасе кхача гӀерт цхьабараш 15-20 минота. Из нийса дац… Хьааравала цӀагӀара 5-10 минот хьалхагӀа, тӀаккха хьай паргӀатта дӀагӀоргва хьо, машинех бикъа латтача наькъ тӀа корзагӀ ца вувлаш.

Наькъашкара кхерамзле лораяра духьала латташ цхьа во да – телефон. Машинех бизза болча наькъ тӀа ваьле, паргӀатта телефонаца къамаьл деш водаш хул цхьавола саг. Из зе йиш хул хьалха йодача машина боларах. Бокъонца хьаькъал дӀадахача санна, кхаст цхьабараш, шоаш наькъ тӀа болга, гонахьа дукха машинаш йолга бицбеле, машин цкъа цхьан оагӀорахьа, тӀаккха вокх оагӀорахьа йоахаш. Цу машина дӀахьалхаваьлча гу хьона, чувагӀар къона саг, доккха гӀулакх къоастадеш йоалла кхалсаг, чӀоагӀа иман дола юхь йола ха яха саг волга…

Иштта хила йиш яц вай! Харцахьа да иштта лелар! Машин лаьлла водача хана телефон хьатехача, къамаьл дӀаьх ма де, ца дийцача даргдоацаш хӀама дале, дӀаюстарваьле, машин соцайийя дувца хьай хьашт мел да. Телефон Ӏайха хьаэццаше, хоам бе хье наькъа водаш хиларах, чукхаьчача бувзаме варгва ала! Массехк шу хьалха Наьсаре тхоашта хинна цхьа хӀама дагадехар сона хӀанз. ЦӀай долча деношка, гаргара нах болча даха арадаьннадар тхо. Светофора хьалхашка латташ, тхона хьалха яр «Мерседес», «Волга».

Хьежаш латташ, мичара йоагӀа ца ховш, эккхайича санна Ӏохьалхаийккхар «девятка» яха машин, догӀан хих биза лаьттача кӀоаг чу кхийтта, хьалтоссаенна, кхыча машина капота тӀа ежар. Даьла къахетамца саг човха ца веш дӀадийрзар из, бакъда хила тарлуш хиннар духьалъэттача унзаро хетар. Массехк сага вахар хада йиш яр цу хатарах. Эггара чӀоагӀагӀа тамаш яйташ дар, машин лоаллаш баьгӀараш дикка ха яха нах хилар. Са цхьан новкъоста оалача беса, цхьавола саг дарба дулургдоацарех ва.

Пенах бат дӀакхийтта «чӀаьпилг» хьахиллалца, меттабагӀац ишттабараш. БурокӀалхара Наьсаре ӀочубоагӀаш бола федеральни оагӀонцара никъ шера, паргӀата ба; бакъда, цхьан моттиге геттара готтлу из; цаӀ, шиъ машин мара дӀа ца йохалуш. ХӀара дийнахьа гуш долча сурто хьагойт; къона, къаьна ва аьнна доацаш; хӀаравар ше-ше хьалхагӀа цига кхача сихлулга. Дехьара, сехьара хьатӀа ца теӀаш; паргӀатта хилча дуккха сихагӀа мукъабаргбар дӀабикъа латта никъ. Бакъда из уйла еш бараш кӀезига хул, хӀаравар сихагӀа дӀахьалхаийккха дӀаваха гӀерт, цӀи яьннача водаш санна. Вай массане кхетаде дезаш хӀама да из - уйла еш, хьаькъале, сабаре хьовзар.

ТӀаккха эшаш хургдац аьнна хет вай массане са лаьца дола, машин сиха хехкаргйоацаш даьхка наькъашкара сунташ. Наькъашка эздел, эхь лорадар геттара хало тӀаяхийта езаш хӀама дац, вайх хӀаране дегӀаца чӀоагӀденна гӀулакхаш хила деза уж. Кхаьч-кхаьчача машин Ӏоувттаю, нах бахача моттиге чехка машин хехка, корта тӀабоаца саг санна кхеста, светофорах дош ца хета оамалаш йита еза вай. ХӀаьта из деррига лорадеш ваха вӀалла хала дац, машина каьхаташ хьаэцача хана; Ӏа хьайца эхь, эздел, яхь, сий хьаэце! Нах лархӀа Ӏомадала деза вай!