«РФ Паччахьалкхен Думан депутат Татренаькъан Муслим вар берригача мехка вай къаман цӏи дӏахазийта бӏухо волча бахар лоархӏаме долга хьалхадаьккхар. Дукха ха йоацаш, саг йоалаяьча ӏаьланна беркатаца, иразаца ваха даькъалавувцаш ловца баьккхар цар. Цхьан истола гонахьа гулбенна, безаме чай молаш дийцар цар тӏема операце доакъашхошта, цар дезалашта новкъостал лоаттадарах, массахана царна терко еш хиларах. Вай мехкадас Келаматанаькъан Махьмуд-ӏаьлас массехказа белгалдарах тарра, тӏема аренашка Даьхен гӏулакхе латтарий, цар дезалий хьашташ кхоачашдар тахан керттерча декхарех да», -  дийцар «Сердалога» «Цаӏ йолча Россе» региональни оагӏонца.

Хьаьший тӏаэца араваьннача Новразанаькъан ӏаьлас аьлар, иштта терко яр цун шийна, тӏема моттигашка лелача бӏухошта дега тоам беш, йоакхо яйташ долга. Къонача бӏухочо белгалдаьчох, Даьхен хӏама лорадара тӏехьа ураотта кийчабарашта чӏоагӏа эшаш да из! Цу оагӏонцарча проекташка гӏолла къахьега аьттув хиларца даькъалабийцар цо дега хьамсара бола хьаьший. Лакха денал, майрал гойташ турпалал дар 19 шерга кхаьча мара воацача ӏаьлас тӏема аренашка гойтар. Доккха ӏаламат эттача моттиге дийна виса ӏаьла кӏалхараваларах дувцаш бар, вай мехка санна ерригача Россе а. Даьла къахетамо кӏалхарваьккхар из саг!

2005-ча шера наджгоанцхой бетта 25-ча дийнахьа Йоккхача Ачалкхе ваьв Новразанаькъан ӏаьла. Сийлахь-боккхача Даьймехка тӏем тӏа, 18 шу даьнна волаш, фашист вохавеш, цун наькъаш тедаш лаьттача ший даь-даь истори довзаш, цох масал хулаш хьалкхийнав из, бера хана денз. Даьхен хӏама лораде ловш хинна Новразанаькъан ӏаьла Магӏалбикерча тӏема комиссариате хьакхаьчар, ишколера цӏахийцача дийнахьа.

Цӏаьхха, хилар цун цу моттиге кхачар - лорашка чакхваьнна воацача сага когаметта дӏаэттар из. Эскаре ваха ӏаьла, ший безам хинна, Украине кхаьчар. «Гӏалгӏа», аьнна, шоллагӏа цӏи яьккхе хьавехаш хинна къона мехкахо, йоккха юкъ ялале, штурмовой рота командира декхараш кхоачашдеш вар.

2024-ча шера бӏаьстан хьалхарча бетта доккхача къемата юкъе нийсбелар уж… Лакхера чуетта болабенна, ерригача ротера бӏухой легабир цу дийнахьа. ӏаьла чӏоагӏа човнаш еш лозавир – ийккхача мино цхьан юкъа сакхетам чура ваьккхар из, хӏаьта ког чӏоагӏа бохабаьбар. Цхьа ха яьнна меттавеначул тӏехьагӏа, кхетадир цо ше цхьаь висалга. Моллагӏча маьхе штабе дӏакхачийта дезаш чӏоагӏа лоархӏаме каьхаташ, хоам бар цунга.

Лозабаь ког болаш, хий доацаш, даарах хӏама доацаш, шелалах вувлавенна волаш, ворхӏ дени буси текхаш вахар 19 шу даланза мара воаца вай мехкахо. Ший кога пӏелгаш гӏорадаьлга кхетадора цо, бакъда фуннагӏа даь а Аллахӏага кхайкаш, «шийбараш» болча тӏакхача гӏерташ, текхаш вахар из. Гӏорадаьча лаьтта гӏолла низах, могашалах веха текхаш из водача хана, цӏагӏарча нахага хоам кхаьчабар из веннав, аьнна.

Тӏема аренашка хиннача довна юкъе шоай виӏий вахар хаьдад аьнна хийтта белхаш, гӏайгӏано вӏашкабихьа хьувзар цун дезал. Дийна виса ӏаьла российски бӏухошта коравир. Бархӏ сахьата ший гивелла текхавеш, тӏом латтача доазон тӏара из аравоаккхаш, никъ бир бӏухочо Иванов Владислава. Тӏема аренашка «ӏаьржаварг» яха цӏи йолаш вар из. Дӏахо, даггара чудеттача герза кӏалха нийсбелар уж, селлара йоккхий човнаш йолаш ше воллаше, лозабаь бӏухой арабаха новкъостал деш хилар вай мехкахо.

Тӏема госпитале ӏочувигар Новразанаькъан ӏаьла. Даьла къахетамца, лораша говза операци дӏайихьа, ког дӏа ца боаккхаш висар из. Шоай низ дӏа мел кхоачар дир лораша, цун ког бита гӏерташ. Тахан а массане тамаш еш хӏама да из! Ерригача Россе дӏадайзар доккхача ӏаламата юкъе дийна висача гӏалгӏай 19 шу даьннача бӏухочун истори.

Федеральни передачашка гӏолла дукха дийцар цо гойтача деналах, майралах. 2024-ча шера «Россе-1» телеканале «Малахов» яхача программаца араяьлар вай мехкахочунна ӏаьланна, цун новкъоста Владислава хетаяь передача. Вӏаший мархӏакхета аьттув хилар цар студе. Россе дахача адамаша тамаш еш моттиг хилар цох… Вахар хӏетта довза волалуш мара воацача 19 шу даьннача вай мехкахочо гойтача турпалча гӏулакхах доаккхал деш бар нах. Могаш, маьрша волаш вахалва из дуккхача шерашка!