Келаматанаькъан Махьмуд-Ӏаьлас, ГӏалгӀай мехка кхадж тасса кийча хиларах, кхетаче дӀайихьар
ГӏалгӀайчен кулгалхочо Келаматанаькъан Махьмуд-Ӏаьла республикан Изберкома кулгалхочунца Йовлой Мусайца, иштта даькъ тӀарча хоржамий комиссе кулгалхошца вӀашагӀкхийтта хилар. Цига дийцар республико кхаь дийнахьа кхадж тасса кийчо яь хиларах. Тов бетта 18-20 деношка кхаччалца республике дӀахьоргда Паччахьалкхен Думан, Халкъа Гуллама депутатий хоржамаш.
«Вай кхетаде деза из паччахьалкхен декхар хилар. Из болх дика вӀашагӀболларах тийша да хоржамаш дӀахьош наьха тешам хилар. Хоржамаш цӀена, къаьга хила деза. Хӏара саг ший хоржамий даькъ тӀа хьа а вена, конституце шийна енна бокъо кхоачашъеш хила веза»,- аьлар Келаматанаькъан Махьмуд-Ӏаьлас, доакъашхошка кхайкарал деш.
Йовлой Мусас дийцар кхадж тоссаш долча деношта мишта кийчо яьй, хӀанз республике бюллетенаш дӀахьош, моттигаш кийчъеш ба.
Берригаш а-ТИК, УИК бокъонаш лораерашца цхьана бувзам болаш болх беш ба.
ГӏалгӀайчен Кулгалхочун Администраце, Паччахьалкхено, нагахьа санна эшаш хуле а аьнна, лаьрххӀа йола балха тоаба вӀашагӀъеллай. Келаматанаькъан Махьмуд-Ӏаьлас декхар тӀадиллад комиссена массайолча оагӀорахьара новкъостал де, иштта моллагӀа нийсденнача хьалах сиха хоам бе, аьнна.
Чаккхе еш, республикан Кулгалхочо тӀахьийхар бехктокхамебараш хоржамаш долча юкъа сакхетам лакха болаш хилара.
