Цӏай дола кхо ди дӏадихьар ламазаш деш, цунца шоай даьлацара тешам лорабеш, иштта бусалба наьха иман чӏоагӏдеш.

Боккхагӏчар Кхела кулгалхочо Загӏенаькъан Мухьмада, «Барт» яхача Францерча Ницца-Шахьара Гӏалгӏай Ассоциаце президента Бӏарахой Бахьаудина новкъосталца, дин ӏадаташ вӏашагӏтохара, гӏалгӏай эздел, сий лорадара майда хилар цӏайх, Марсель -Шахьара Лотарингия (Франци) оагӏон кхетаче йолаш. Лондон-Шахьара (Англи), иштта кхыча моттигашкара 180 вахархо вера. Иштта дукха хьаьший баьхка хиларо хьагойт, вай мехкахой, эзараш километраш гаьна болаш а, шоай къаман хьалхашкара декхар диц ца деш хилар.

Уж дицде йиш йолаш бац шоай хьамсара овлаш, дин, хӏаьта Мархаш хӏара шера дег чура нах цӏенбеш дола деза денош да. Гӏалгӏай къаман дукхагӏа дезаш долча даарашца, ловцашца хотталу вайнаха юкъера бувзам.

Боккхагӏчар оалаш дола дош, цар хьехам вай кагирхошка даим дӏакхоачаш хиннад, цунца шоай вахара никъ сийрдабоаккхаш.

Къаьстта терко тӏаяхийта лов къаман даар лорадеш болча наха. Вай мехкахо Бӏарахой Лиза хьежар, кхыча кхалнахаца цхьана, бокъонца дола цӏай хьакхолла, хӏара даар Даьхенцара безам гуш хилийта.

Карарча хана даар хӏара сага шийна бакъахьа хеттача беса кийчду, цхьайолча хана модах тара долаш а хул. Иштта дале а, Европан гӏалгӏай цӏаккха а хиннабац чӏаьпилг, сискал ца езаш. Из барт-цхьоагӏо ийша ха ма йоагӏийла вай къаманга цӏаккха а. Ницце, Марселе, кхыча моттигашка бахаш бола нах дог гӏоздаьнна, цхьа дезал санна барт болаш хилар цӏай долча деношка. Из вай фусамашкара хаьда ха ма йоагӏийла арахьа а иштта укх вай мехка а бахача дезалашка»,- аьлар франко-гӏалгӏай тохкама центр вӏашагӏъеллача Боканаькъан ӏийсас.

Бераша дуне сийрдагӏа, дикагӏа ду. Цар дегаш цӏена хиларо, дикача хӏаман тӏехьа хиларо барт бу наха юкъе. Лоархӏаме да, кхувш йоагӏа тӏехье бӏаьшерашка денз хьадоагӏа ӏадаташ лорадеш хилар. Ид аль-Фитр цӏай долаш, 60 зӏамигача доакъашхочоа Ницца-Шахьаре совгӏаташ делар. Цу тайпарча моттиго цар къаман ӏадатацара безам совбоаккх. Кхыча паччахьалкхенашка бахача гӏалгӏаша лораду шоай ӏадат, цун кӏоарга маӏан довзаш а дезаш а шоаш хилар гойташ, ислама дин тӏехьале нийсхонна, дикача гӏулакхашта тӏехьа хилар гойт.