Кулг кховдадеш
«Даьхен лорбой» яхача ганзо ший доалахьарчарна гӀо ду
Украинера тӀема операци йолаеннача дийнахьа денз, дукха адам арадаьлар Даьхен гӀулакха. БӀухой шоай декхараш токхаш тӀема аренашка лел, хӀаьта цар цӀагӀарча наха эшачунга хьожаш, терко лоаттаеш «Даьхен лорбой» яхача моттигерча филиала болхлой ба. Ши шу доал ганз хьакхелла. Цу оагӀон хьалхалаттача Оздой Муслимаца къамаьл деш, кхетаче дӀаяхьа лаьрхӀар «Сердало» яхача Кепайоазон цӀено.
- ТӀема операце бӀухошца, цар цӀагӀарча нахаца эггара керттердар фуд?
- Нахаца къахетаме хилар! Нийсхо лоаттаеш, Ӏимерза, безаме хилар. Иштта, ма хулла сихагӀа гӀо деш хилар, терко лоаттаяр.
- СВО доакъашхой дезалашта новкъостал лоаттадар мишта дӀахьу оаш?
- Шин оагӀонца латташ ба тха болх. ЦӀагӀа долхаш, царна эшар фуд тохк оаха. ШоллагӀа - наьха дехараш тахкара моттиг. Вахара дешаш къестадерашца шоаш бувзаме боал гӀо эшараш.
- МалагӀа халонаш хул цар вахаре, царна мел эшар Ӏалашде аьттув хулий шун?
- ХӀара сага халонаш тайп-тайпара хул. ДукхагӀча даькъе ЖКХ оагӀонца дувзаделе хул дехараш, иштта дарбанчера гӀо эшаш, Ӏаьдалгара хьадоагӀа ахча ханнахьа хьадалийтар дехаш, цхьацца хӀама дӀадоладе новкъостал де, яхаш, ух нах.
- Укх шин шера дикка аьттув баьннарех дувцал тхона.
- 3000 совгӀа дехар тӀаэцаш, тохкаш хилар тхо дӀадахача шера. Эггара керттердар - тахан наха гӀо де аьттув хилар, дикка гӀо де низ дӀакхачар.
- «Турпала никъ» яхача программах фу аргдар Ӏа?
- Из моттигера проект я, ерригача Россе проект - «Турпалхой ха». ТӀема операце доакъашхошта болх лаха, деша гӀо дара тӀехьа вӀашагӀъеллай из проект вай мехка.
- Вай къаман бӀухошта юкъе дикка яьржа йий из тахан?
- Паччахьалкхен, муниципальни моттигашка балха отта гӀо деш я проект. Геттара чӀоагӀа хьаллаьцай ала йиш я из вай мехкахоша. Дукха ха йоацаш, ганза доазон тӀа Мехкадаь, Паччахьалкхен администраце болхлоша хоржамий болх дӀабихьар. Йоккха юкъ ялалехь, уж балхаш тӀа болаш бӀаргагорга сатувс вай.
- ТӀема операце доакъашхошта чӀоагӀа лоархӀаме да, шоай оагӀув хьаллоацаш, дега сатем беш дола къамаьл дар. Цу оагӀонца малагӀа тайпа болх дӀахьу оаш?
- Минздраво хьахержа психологаш ба царца болх беш. Царца хан-ханнахьа кхетаченаш дӀакхухьаш ба уж. Белгалде деза, эггара йоккхагӀа терко, гӀо тӀема аренашка къонгаш лийгарашта, де доацаш байнарий дезалашта эшилга. ТӀема операце бӀухой шоаш-м сиха меттабоагӀа, вахарера шоай гӀулакхаш леладе болалу, чӀоагӀагӀа хьажа везараш цар цӀагӀара нах ба: царех дог лазаш, во кхаъ хазар кхераш сахьувзаш баьгӀа.
- Хьона доккха баркал оал оаха тхоаш тӀаэцарах! Хьакхеллача денца даькъалаювц «Даьхен лорбой» яха ганз. Могаш-маьрша долаш, аьттонца, беркатаца шоай болх дӀабахьа низ хилба шун, иштта бехктокхаме шоай декхараш кхоачашдеш дӀачакхдалда шо!
