Дукхача туристашца болх дӀахьош йола «Бэлла-тур», «Визит-Ингушетия» яха оагӀонаш дайзар хьаьшашта. Таханарча дийнахьа доккха баркал ала дезаш да цу агенствашта, хӀана аьлча, цар рекламо, шоай болх дика харо вай мохк лакхача лагӀа тӀа латтийт.

«ГӀалай мохк» безабенна, тахан ЖӀайрахьа кхалера цун 3000 совгӀа йола гӀалаш бӀаргаго ловраш дукха ба туристашта юкъе. Туристаша дукхагӀа долча даькъе лоаман моттигашка го боахаш хиларах, «Ӏарамхи» курорта хӀама тоадар керте лаца деза. Цу оагӀонцарча балхех дийцар «Крокус Экспо» яхача Къамашта юкъерча туристически гойтаме. Цига хинна хьал хьоахаде эттача, белгалде деза, Россе эггара къонагӀа йола моттиг Еврази дехьарча моттигашка дикка дӀаяйзалга.

Вайцигарча викалаша гойтар лоаман модз, «Ачалкхе» яха хий, вай мехкарча бешамашка кхебаь Ӏажаш, Шаденаькъан Ахьмада говзалца хьакхелла чкъаьран цӀоках хьаяь хӀамаш арахецача «ShadӀ» яхача моттига тамашийна хоза балхаш. Россе тайп-тайпарча моттигашца туристически турашцара бувзам чӀоагӀбир вай мехко. Иштта массехк бувзам чӀоагӀбеш моттиг дӀайихьар цига туризмах йолча комитета хьалхалаттача Цхьорой Мухьмада. Узбекистанерча викалашцара бувзам чӀоагӀбир, иштта Свердловскаца, Татарстанаца баьча бартчӀоагӀама юкъе цхьацца хувцамаш доаладир.

Цхьорой Мухьмада белгалдечох, Москвера гойтам къамашта юкъера туристически бизнес йоаржаяра тӀехьа накъабоалаш хилар. ГӀалгӀайчен хоза моттигаш йовза безам бараш ма хулла дукхагӀа хиларга сатувсаш хургда вай, хӀаьта гӀалгӀай къам массахана хиннад хьаьший безаш, тӀаэца ховш.