Хоам бу, гIалгIай паччахьалкхен 100 шу дизара хетаяь из хилар. Цига дакъа лоацаш хилар дукха кхоллама нах. Уж бар французски культуран ассоциацей викалаш, Парижа университетий хьехархой, студенташ, ЮНЕСКО викалаш, гIалгIай студенташ, говзанчаш, кхыбола цига бийха хинна хьаьший.

Цу кхетаче хиннача наха боккха теркам тIабахийтар ГIалгIайчен культуран, архитектуран мах барашта. Франко-ГIалгIай тохкама центра дика къахьийгар, ГIалгIай Республикан таханарча заман культуран, туризман, вахара-экономически толамаш французски говзанчашта дIадовзийташ.

Парижа культуран центре хиннача наьха таро хилар, шоашта бIарга а гуш, цу гойтама мах оттабе. Цига го йиш яр вай мехка культуран дикаш, тамашийна хоза Iалам, ше морг кхы боаца къаман гIирс гойташ дола суртанчий балхаш.

Цу мугIаре шоай лаьрххIа йола моттиг дIалоацаш хилар гIалгIай истингаш, курхьарсаш, къаман даар.

Хоам бу, ГIалгIайчен культурни презентаци хьайийллар, Iилман, культуран Эрсий цIен кулгалхочун гIончас Овчинникова Асяс, иштта Франко-ГIалгIай тохкама цIен кулгалхочо Боканаькъан Iийсас. Цу кхетаче хиннарашца онлайн къамаьл дир ГIалгIай Республикан миннаца кулгалхочо Мизенаькъан Руслана. Цул тIехьагIа хьекхар, вай республикан таханара вахар гойташ дола фильм, цул совгIа тамашийна лоаман ГIалгIайчен гIалай суртий гойтам а хилар.

Цу тайпара гойтамаш дикагIа дола масал да, ГIалгIайчен дийнача вахарах бола хоам кхыча мехка бахача наха бовзийта. Кхерах хьалъяь гIалаш, тамашийна хоза гахьар дола кIувсаш, дукхача тайпара художественни балхаш хиларах уйла еш, къаман Iадаташ мел хьаькъале да кхетадеш, къаман гIирсах, вахаре леладеча кхыча хIамаех цецбувлаш, иштта кхы дукха хоза хьалаш бIаргагуш вола саг тара ва, цIенача хьастара хий молаш волча сагах.

Боккха теркам тIабахийтар, Пхьуй оалача моттиге кхерах балхаш де Iомавара хьалхара ишкол хьаеллара, цига дийша, Iомабенна баьннараш ба, биткъа ботташ, гIишлош еш боахкараш. Цар балха лакха мах оттабир.

Тха болхлоша белгалдир, Россе массаханарча ЮНЕСКО чувоагIаш волча викала гIончас Ринза Кирилла лакха мах оттабир цига хиннача материалашта; цо белгалдир, ГIалгIайчен культуран, туризман, экономикан хьалаш дувцаш бола гойтам дIабахьара ше новкъостал де кийча хилар.

Сорбонна университета хьехархочо Менеле яхачох, исторически тIехьален мах бола, тамашийна гIишлош лораяр, гIалгIай Iадаташ, культура Европа бахархошта гойта кийча хилар да.

ЧIоагIа лоархIаме да, ГIалгIайчено Париже дIабихьача гойтаме, мах оттабе ховш бола говзанчаш хилар. Цигарча Франко-ГIалгIай тохкама центро халкъашта юкъерча проектаца шоай хувцамаш даьд; гIалгIай культура, мотт, литература ше йолча моттигашка хургдолаш.

Цу дикача, ца хилча баргбоацача балхо дIахохьоргда, боккхача безамца, Бельгера, Францера, Германера, Голландера, ГIалгIайчен бахархой юкъебахар - ма хулла дукхагIа ГIалгIайчен культурно-исторически мах бараш Европа бахархошта цар довзийтар.

Шеко а яц, ГIалгIайчен селханара, таханара вахар довзарца; европейцаша шоашта кердадараш хьаделларгда, керда мах оттабергба. Цар безам хургба мичча хана баьхка а вай хозача мехка бахка, ГIалгIайчен вахар бIаргаго.