Лоамашкара вӀашагӀкхетар
«Бейни-2024» яха ерригача Россе кагирхой кхетаче дӀахьоргья вай мехка
Укх бетта 10-ча денгара 22-ча денга кхаччалца, «Бейни-2024» яха ерригача Россе туристий чаьтарий лагерь латтаргья вай мехкарча лоаме. 16 шергара дӀахо болча студенташа дакъа лоацаргда тайп-тайпарча кхетаченашка, шоашта накъадаргдола дуккхадараш довзаргда цига, бувзам чӀоагӀбергба кхыча мехкашкарча кагирхошца. Из хоам «Сердалога» бир кагирхой политикахи туризмахи йолча Министерство.
«Бейни-2024» яхача кхетаче кагирхой аьттув ба, пайда эцаш ха дӀаяхьа, шоаш Ӏомадаьр шаьрде, керда новкъостий харжа, иштта ГӀалгӀайчен моттигашка салаӀа.
Хозача Ӏаламца дог ловзаш салаӀарал совгӀа, спорта яхьашка, цхьацца балхаш деча гойтамашка дакъа лоацаргда цар, йовзаргья мехка культура, цун истори.
«Дешар» яхача къаман проектага гӀолла дӀахьоча «Кагирхой мохк» яхача программа проект я из. «Дог тийша да тхо, «Бейни-2024» хӀара доакъашхочун самукъадоалаш хургхиларах, иштта вай мехкара туризм йоаржаяра тӀехьа а доккха дакъа дӀалоацаргда цо.
Вай мехкара хоза, беркате моттигаш яйза къонабараш; кхы а юхааха чам болаш хургба», - дийцар тха газетага.
