«Сердало» газета корреспондентаца къамаьл деш, ший вахарах, балхах лаьца дийцар Луизас, хьоахадир ше хьаккхеллача пирожнех, кхалнах Ӏомабеш ше дӀакхухьаш йолча курсех.

- Луиза, Ӏа кӀеззига хьай вахарах дийцача бакъахьа хетар сона. Мерза даараш кийчдеш бола болх мишта безабелар хьона?

- Со Буро тӀа яьй, бакъда са деррига берал Ӏарамхе дӀадахад. Гонахьа лоалахой тӀехьа боацаш, моттиг яр со яьхар. Итт шу даьннача хана Ӏемар со торташ е, бакъда сай дагалаттачунга кхача, из кхоачашде дикка шераш ийшар сона. Банке бухгалтер йолаш дӀахьош хинна болх, цхьан дийнахьа Ӏобилла, араяьлар со. Ма дарра аьлча, цхьаккха тайпара сайна, наха пайда беш йоацаш; зехьа ха йоае кӀордадаьдар сона. Мерза даараш кийчде Ӏомавеш йолча курсашка аха йолаелар со, геттара чам чубенна. Кислицын Александра цӀерах йолча Москверча ишколе дешаш яр со. Краснодаре, Махачкале, Казане курсаш чакхйоахаш къахьийгар аз, цӀихезача кондитера Агзамов Рената а тӀехьа хьийхад сона.

- Оалаш да-кх, кхача кийчбеча хӀара сага ший говзал я аьле. ХӀара дийнахьара хьай болх Ӏа мишта дӀакхухь?

- Из тешшаме да! ХӀара кондитера, ший говзал юкъейоалаеш, дӀахьу ший болх. Тайп-тайпара хӀамаш вӀашагӀъетташ, ший тайпара чам тоабеш, дӀакхухьаш хоза хет сона сай болх. Вай къаман нах мерзача даарашта тӀера ба, цудухьа хӀаранена чам хургболча тайпара кийчбе хьож со сай кхача. ХӀама эца воагӀачун фу хозахетаргда кхетадеш, хила веза кондитер.

- 127, 5 метр йӀаьха, 1345 кийла еза «Брауни» Ӏа кийчъярах; Россе рекордех долча Книжканна юкъейихьай хьа цӀи. Мишта дагадехар хьона из тайпара тамашийна болх бе?

- Сай къаман вахаре цхьа хоза лар йита безам боагӀар са а, моллагӀча ший Даьхе езаш волчо санна. Из ираз массанега кхачац, бакъда дикка къахьега деза иштта хӀама де хье ловш вале. ХӀаьта мерза даараш кийчдеча балха юкъе са хьинар дикка айлу.

- Тахан чӀоагӀа дукха мерза даараш даьржад вайна. Цхьаннена дубайски шоколад еза, хӀаьта кхыбарашта шоколада юкъебехка сомаш хоза хет. ХӀара дийнахьа уж хӀамаш хьадаржар вӀалла хьокхалой хьа балхах?

- Духхьал интернете гӀолла айдаь, доаржадаь леладу хӀама да из! Тахан цу хӀамашка наха шоаш селлара корзагӀбахийтарах тамаш ю аз. Цхьаннена дагадеха, берригаш дӀатӀехьабаьнна, доаржадаь дӀахьош гӀулакх да из. Сога хаьттача, цу кхачал дуккха чам болашагӀа да-кх вай мерза дуга, хьовла. Вай ноаношкара хьакхаьча, тхьовра денз хьадахьача даарел хозагӀа фу хила йиш я?!. ХьоалчагӀа долча оттадаьча истолаш тӀара, наха эггара чамегӀа хеташ, из кхача буаргбар аьнна хет сона. ХӀаранена бера ха дагайохийташ, хоза даар да-кх из!

- Хьа балха юкъе эггара керттердар фуд?

- Нах безаш хилар! Нахаца хоза, мерза дувца ца хой, дог тийша хила мара везац, хьона хеттача тайпара дӀагӀоргдац хьа цхьаккха хӀама.

- Аьттув боацаш, чам байна ха йоагӀий хьога, Луиза? Иштта хьал хилча фу ду Ӏа?

- ХӀаране вахаре санна, са балха а нийслу цу тайпара хӀама. Сайна садаккха цхьа ха лу аз… Ше-шийца къамаьл де ховш хила веза къахьегаш вола саг. Догьийккха, кулгаш вӀашкадаьхка Ӏоха йиш яц, ший дог ураоттаде, сомадаккха ховш хила веза.

- Мерза даараш кийчдеча сага лоархӀамедар фуд?

- Кондитер яха саг чӀоагӀа сабар, сатем болаш хила веза. МоллагӀа хӀама хьаӀомаде йиш я, бакъда хьога сабар ца хуле, ма хетта дӀадохьалургдац цхьаккха гӀулакх.

- Массайтта шера из болх лелабеш, малагӀа хӀама да Ӏа, хиланза даргдац, аьнна, дикка кхетадаьр?

- Эггара керттердар, айса дӀахьоча балха, сай къамаьла доал де Ӏемай со. Хьоца болх дӀахьош бола нах гӀалатбаьлча, хьогара хӀама эцаш болча нахацара гӀулакх а хада тарлу… Цудухьа уж хӀамаш чӀоагӀа лораде, фийла хила веза. ШоллагӀа, хӀама хьадеш волча сага цхьаь дӀадохьалургдац ший гӀулакх, хӀара сага тӀалатташ ше-ший декхар хила деза.

- Хьай болх нахалбаккхийта безаш хулий хьо блогерашка?

- ЦӀаккха а блогерашкара гӀо деха дезаш хиннаяц со. Царна духьала цхьаккха хӀама долаш яхац аз из; бакъда наха шоайла дӀа-хьа оалаш, дӀадодаш дар лакхагӀа, дикагӀа хет сона кондитера балха юкъе; хӀана аьлча наха бакъдар мара алац, шоашта мерза хийттар мара могадац.

- Шун даарашта юкъе, эггара чӀоагӀагӀа къахьийга кийчде дезараш малагӀаш да?

- Оаха хьаеш мел йола хӀама дикка къахьега дезаш, дукха низ эшаш я. Тайп-тайпара варенеш, чуйоллаш йола хӀама оахош хьаю оаха. Дикка къахьийгачул тӀехьагӀа, чам бола даар хьахулаш хилча, йоаеш йола ха вӀалла дагаялла а езац, аьнна, хет сона.

- Нах Ӏомабеш Ӏайха дӀахьоча балхах дувцал вайна, Луиза.

- 9 шергара 17 шерга кхаччалца дола бераш Ӏомадеш я со. Са чӀоагӀа чам ба зӀамига йиӀигаш хоза торташ, пирожнеш е Ӏомае. Берий цецбаларо, гӀадбахаро низ тел сона, кхы а чӀоагӀагӀа ураоттаду дог. Духхьал Ӏайха леладечун мара уйла ца еш, деррига дӀадицлу хьона, берашца болх беча хана. Цар доага бӀаргаш, хӀама Ӏомаде чам хилар хам баь варгвоацаш да!