Нагахьа санна догьийккха моттиг хилча; дагабоха беза, таханарча денга кхаччалца шоай никъ хьабена, хӀара баьккхача толама гӀадболхаш хиннараш.

24 шу даьнна каратист Янарсанаькъан Абубакара Ислам ший балха даькъ тӀа дика кхетадеш ва, спортсменаш мишта болх халонех чакхбаьле, шоай хьехамчаш бенна тешам боа ца бе гӀерташ, каталонца хьамсарча ГӀалгӀайчен сий доаккхаш.

«Сердало» газета корреспондентаца къамаьл деш, цо дийцар шийна хьалхашка оттадаьча вахара декхарех, ше 14 шу хьалха спортивни даькъ тӀа хьалхара гӏа баккхарах.

- Ислам, хьайх лаьца дувцал вайна.

- Со ваьв Шолже. ЯлхлагӀча классага кхаччалца цига деша ваьгӀар со. Кастлуш тхо даха дӀадахар Пхьилекъонгий-Юрта, аз лаьрхӀар цига цхьацца дола спорта тайпаш кӀоаргга довза. Карарча шера йистеяьккхай аз юридически говзал ӏомаеш йола колледж, бакъда спортацара гӀулакх со дита лаьрхӀа вац.

- Мишта дувзадир Ӏа хьай вахар каратэца?

- Вахаро таронаш лу, сага шийна эггара чӀоагӀагӀа эшар хьаэц. Каратэцара аз никъ лехар, сайна тӀабоагӀаш бола, дика оамалаш ӏомаяра, сатем болаш хилара. Сай эгӀазал юхакъовлаш сатоха хар, се беволла хар, из мах баь варгвоацар да. Дукхадар даь даьннад цу юкъа, бакъда де дезар кхы а дукхагӀа да.

- Хӏанз 14 шу мара даьннадеце а спорте вола, хьо ва цу даькъ тӀа тахан цӀихеза спортсмен. МалагӀа халонаш нийслу хьона цу даькъ тӀа? ХалагӀа хиннар малагӀа дар?

- Эггара халагӀа да тренера сатувсар доадар, цун тешам боабар. Сога хаьттача, дукхагӀа дагадоагӀаш мел хул хьийга къа, дӀайихьа тренировкаш, боабаь низ, ха, тӏаккха дикагӀа кхетаду бехктокхаме хилар.

- Хьо дунен Чемпионате котваьлар, массе тайпа каратэ дӀахьош хиннача, 2023 шера лайчилла бетта 8-ча дийнахьа Орел оалача шахьаре. Мишта кхоачашдир ӏа хьалхашка лаьтта декхараш, боккхача толамга кхоачаш?

- Шеко йоацаш, моллагӀа къахьегам ший халонаш йолаш ба. Цхьацца долча бахьанех, хьалхашка латта декхараш кхоачашдара хьал массаза хилац сатийсача беса. Бакъда 90 кг дозал дарашца латаш декхар кхоачашдарах; иштта халкъашта юкъерча класса спорта мастера боарам кхоачашбарах сона еннача дошоча майдилго коталон чамага кхоачавир со; цул совгӀа, сай профессиональни дегӀавар а теркаме ийцар. Укхаза иштта дакъа лоацаш да яхьаш йоккха хилар. Орел яхача шахьаре аз хьалхара гойтар говзал каратэ латаш барашта юкъе, уж баьхкабар дунен 26 мехкара. Керттердар - кхозза латаш, со йиллача ханал хьалхагӀа котваьлар, из да-кх со сайна вовзар.

- Мичахьа накъайоал хьона спорт хьай вахаре?

- Спорте аз даьха толамаш сона накъадоал, сайна карагӀдоалачох со тешаш хиларах, цо чӀоагӀбу бехктокхам, цо новкъостал ду моллагӀча хьалашка кхаьчача. Спорто сона деррига деннад, сона ца хийттача тайпара.

- Кхыча спортаца вувзавенна хиннавий хьо?

- Хиннав. Каратэга меттел, грэпплингага а иштта вӀашагӀъийнача латарга а (ММА), хьежав со. Со Россе, дунен чемпион ва грэпплингах (АСВ JJ). Массехк шу хьалха са аьттув баьлар цу даькъ тӏа Россе Хьалхале яккха, из дӀахьош яр Московски областа Наро-Фоминск оалача шахьаре.

300 спортсмен гаргга вар цига вена, тайп-тайпарча мехкашкара грэпплингах, иштта грэпплинг-ги оалачох къовсавенна. Ала хӀама доацаш, гӀалгӀай грэпплинга ишколо ше дика дӀагойтар. Оаха – гулъяьча тоабан доакъашхоша, шин дийнахьа яхьаш дӀахьош паргӀата садаккханзар, тхона дагадоаллар котало яккхар, бакъда оаха диа са зехьа довнзар.

ММАна доагӏаш аьлча, ӏомавалара программе дакъа лоацаш хилар со вӏашагӏъийнача латарах (ММА) искусствай EKF Martӏal Arts.

Дукха ха яц сона путевка енна Россе Хьалхален юкъе дакъа лаца, бакъда дагадоацаш нийсденнача бахьанах са цига гӏолга хиланзар.

Ала дезаш да, дӏадахача шерарча профессиональни NFL лига хьалхаленах цига кхоъ котало яккха таро хилар. Со тешаш ва, лайчилла бетта юха а цига котало яккхарах сайна ловцаш доахаргда, аьнна.

- Сенна тӏахьехаргьяр ӏа юкъарло? Фу ала ловргдар хьона?

- Из, кхоачам болаш, доккха хаттар да. Нагахьа санна вай дега паргӏато хургьяр дувца доахке, воайла къахетамегӏа, дикаш дара тӏакхувш, син паргӏатагӏа, халахетарашта къинтӏерадоалаш хила деза вай. Цул совгӏа, вай бахархой аз тӏахьех шоай дегӏага хьожаш хилара. Вай йоккхийча технологей таронаша, цхьаннена а къайле йолаш дац, физически культуро сага могашал тоаеш хилар, цо хьакхолл сага лоӏам, новкъостал ду халахетар ла. Бакъда каст-каста нийслу сона спорт ца езаш бола нах.

- Фуд хьа дог ураоттаду керттердар? Мел ӏаткъаш да из хьа вахара?

- Эггара доккхагӏа дола бахьан да са дезал. Цо со хьаллоац дешаца, гӏулакхаца. Хӏара сага лоархӏаме да уллув саг хилар, хьайх дог лазаш. Са гаргара нах тешаш ба са толамех, цудухьа аз а лоархӏ цар уйла кхоачашъе езаш се ва, аьнна.

- Хьалха ӏа дийцадар, дӏахо а спортивни никъ дӏабахьа безам болаш хиларах. Мала хила безам ба хьа, вахара кердача наькъ тӏа?

- Йоккхача планашка хьежача – UFC чемпион хила безам са, цӏи луча латарах котало яккха, иштта организаце тӏехкар даккха. Из доацаш а, сона лов сай вахар дика дӏадахьа; сайх дезала, мехкахоша доаккхал дергдолаш.

- Баркал хьона тха хаттарашта жоп даларах. Аьттув хилба хьа, лоархӏамеча спорта наькъ тӏа.