«Сердало» газетага Тенканаькъан Башира дийцачох, вай республике бӏухошта эшаш йола хӏамаш кийчъеш болх ба дӏахьош «Къаман фронт. Деррига а Коталон духьа» яхача оагӏонца. Мехкара бахархой, хьакимаш, цхьацца болх дӏахьош йолча моттигий тоабаш шоай низ дӏа ма кхоачча из гӏулакх хьаллоацаш, доаржадеш ба тахан. Тӏема аренашка шоай цӏенах, мехках хьегаш лелача бӏухошта терко лоаттаяр, царна фу эш хьожаш хилар чӏоагӏа лоархӏаме да вайна массанена. Терко еш хиларо цар дог ураоттаду, хала денош кхаьчача шоаш цхьаь боацилга, шоашкара хало екъараш, оагӏув хьаллоацараш болга ховш хиларо кӏеззига салоӏам бу.

Республикерча тайп-тайпарча паччахьалкхен моттигаша хьаллаьцар из гӏулакх. Ханахьа талхаш боаца кхача чубола яьшкаш кийчйир Россе вай мехкарча ФСБ моттиго. Тӏема аренашка моастагӏчоа хоалургбоацаш, эшаш дола цхаралаш кийчдир бӏухошта вай мехкарча Федеральни моттига Къилбаседа Кавказа статистиках болча паччахьалкхен оагӏон болхлоша. Хӏамашта юкъе ба ше къаьстта болх бу генератор. Тӏема аренашка из боацаш хиларо цхьацца дола тӏема декхараш кхоачашде аьттув хилийтац бӏухой. Хӏаьта эггара лоархӏамедар,

Тенканаькъан Башира белгалдечох, вай бӏухошца къамаьл де, царех бӏаргтоха аьттув хилар да. Халача деноша оттабаьбале а, юхь тӏара белаш тӏаэц цар вай мехкахой.

Чӏоагӏа баркал оалаш хул уж шоашта терко лоаттаярах. Гӏо лоаттадарал совгӏа, цӏагӏа шоаш дагабоахкаш, шоай гӏайгӏа еш, маьрша болаш цӏенах кхеталба яхаш тӏехьа дуӏаш дераш болга ховш хиларо дега аттагӏа хетийт царна. Тахан цар шоашта хьатӏаийца декхараш аттачарех дац.

Моастагӏий доаде, когаш ӏотӏахьакха гӏерта Россе истори меттаоттаде, шоай лаьтта баха, шоай мотт бувца вай берий аьттув хилийта гӏерташ, дӏахьош операци я из. Гӏалгӏай къаман бӏухой тӏема аренашка тахан цӏихеза ба денал, майрал долаш хиларца.

Бӏухошка дӏакхаьча хӏара раци, хӏара генератор, иштта кхыдараш а царна доккха новкъостал хулаш да. Паргӏата, машаре йолча кхоаненга сатувсаш да вай дерригаш тахан.

«Российски бӏухошта хьалхашка латтараш тахан доккхий декхараш да. Вай дерригаш цар оагӏув хьаллоацаш, терко еш, царна тӏехьа Даьлага дуӏаш деш хила деза,- аьлар Тенканаькъан Башира. Вай Даьхен кхоане бахьан арабаьнна нах ба уж. Могаш, маьрша болаш цӏенах кхеталба вай бӏухой. Цхьаккха хӏамах кхера ца безаш, паргӏатта баха йиш йола ха оттийла тахан халача хьале барашка».