Ницце, кхаь дийнахьа цӀай хилар; бераш, кагирхой, мехкарий мархашта накъабахар дега йӀовхалца, шоайла даькъала бувцаш, истолаш даарах диза, къаман даараш кийчдаь. Мархаш доаста хьалхара ди чакхдоалаш, малхбоален шахьаре Ницце гулбелар Франце тайп-тайпарча шахьарашка бахаш бола гӀалгӀай дезалаш, мархий бутт чакхбалара цӀай дезде. Къоаной Кхела, «ГӏалгӀай» ассоциаце президента Бӏарахой Бахьаудина йоккха кхетаче вӀашагӀъеллар Мархаш йистедаларца ювзаенна, цу юкъе кагирхошта вай Ӏадаташ довзийтар.

Бӏарчча ди дӀадихьар тайп-тайпарча моттигашкара, шахьарашкара хьаьший тӀаэцаш: Ницца, Тулон, Страсбург, Лоррен, иштта кхычахьара. ЛаьрххӀа берашта, ондаргашта, мехкарашта из болх вӀашагӀбеллараша цӀайна хетадаь къаьст-къаьстта истолаш кийчдаьдар, къаман даараш тӀадолаш, иштта оттадаьдар гӀалгӀай ловзар, берашта совгӀаташ а луш. Цига белгалдоалаш дар, Ницца къоаноша кагирхошта, университета студенташта тӀадилла хилар ГӏалгӀайчен культуран совгӀатий оагӀув дӀаяхьар, хӀаьта кагирхоша из дика кхоачаш а дир. Вай дика начӀал дола кагирхой ба Ницце. Къаьстта баркал ала лов Ницце бахача гӀалгӀай кхалнаха, цар дика истолаш кийчдаьдар хьаьшашта.

ГӏалгӀай дезалаш кийчлуш бар дика вӀашагӀкхийтта 200 саг совгӀа: бераш, кагирхой, - дукха хозаш дар гӀалгӀай дешаш, вай наьна мотт, Ӏадаташ лорадеш хилар, нахацара безам эцаш хилар. Иштта йолча кхетаченаша вахара а административни а хаттараш кхоачашде таро лу.

Цӏайна хетаяьча кхетачене вена хилар Ниццера российски посольствон консул, Францера нохчий ассоциаце викалаш, кхыча къамех бола нах. Моаршал хоатташ гулбеннарашка къамаьл дир ассоциаце президента Бӏарахой Бахьаудина, РФ консула Галактионов Сергей Дмитриевича, франко-гӏалгӀай центра кулгалхочо Боканаькъан Ӏийсас, иштта Францерча нохчий ассоциаце хьаьшаша. Цу тайпара кхетаченаш дӀахьош хиларо таро лу Франце моттигашка баха гӀалгӀай къаман нах вӀашагӀтоха. Тахан зале бар гӀалгӀай дезал, йӀаьххача хана шоайла вӀаший байнабацар уж, бакъда массане а цаӀ долаш тӀаэцаш хиннар дар, безача бетто шоаш вӀашагӀтохар.

Цу тайпарча гӀулакхашка гӀолла шоайла гаргаух гӀалгӀай дезалаш, барт чӀоагӀбу, цхьоагӀо кхолл дегашка, цхьана Далла тӀаберзар а хул.

Баркал оал дег чура Ницца-Шахьаре бахача гӀалгӀай дезалашта, Къоаной Кхело (ЗагӀенаькъан Мухьмада, Баканаькъан Хьасана), «ГӏалгӀай» ассоциаце (Бӏарахой Бахьаудина) цу тайпара цӀай-кхетаче ярах, иштта хоза нах тӀаэца цар таро хиларах, Рамадан бутт чакхбоалаш. Ницце, Марселе, кхыча моттигашка кхотабенна бахаш болча гӀалгӀай дезалашта из ГӏалгӀайчен цхьа дакъа хинна дӀаэттар. Из барт, цхьоагӀо, вошал ма дохалда гӀалгӀашта юкъера, шоаш арахьа бахача мехкашка.