Доккхача хьаькъалга бода никъ
ГӏалгӀаша толамаш доах тайп-тайпарча Ӏилмай балхашка
ГӏалгӀайчен Ӏилмо хьагойт тахан, республике укх тӀеххьарча шерашка дукха начӀал дола, лаьрхӀачунга кхача гӀерташ, кердача ноахалах бола викалаш вай хилар. Цох дувцаш, профессора, экономически Ӏилмай доктора, Сорбонна Университета тохкамхочо Боканаькъан Ӏийсас белгалдир, «Россе, кхыча Европейски Союза мехкашка керда тохкама балхаш леладергдола ноахал дӀадолалуш хилар.
«ГӏалгӀай Ӏилман нах - 2024 шера» яха проект кхоачашъеш, герга истолаш дӀахьош,шоайла цу даькъ тӀара балха говзал дӀа-юха луш цхьана тохкама балхаш дӀахьоча, Франко-ГӏалгӀай тохкама центро зийра сийрда, начӀал дола Ӏилмай тохкамхой, инженераш, менеджераш вай хилар.
Цо иштта белагалдир, цар тахан латташ йолча ханара тӀахьехамаш тӀа а эцаш, даим шоай балха говзал лакхъеш хилар, шоай балхашка белгалбала гӀерташ уж хилар. Уж ба бехктокхаме а болаш, кхоллама таронаш а йолаш, шоай хьамсарча мехках дог лазаш бола нах.
«Хоза хетт, гӀалгӀай къона тохкамхой иштта болаш, уж кӀоаргга кхеташ ба шоаш дӀахьоча балхах,царна хов хьалхашка латта декхараш лерттӀа кхоачашде, шоай хаттараш къоастаде. Вай кхувш йоагӀа тӀехье я тахан царех майрра дувца йиш йолаш.
Уж ба хьалхарча аргӀагӀа: Къоастой Ӏабаса Зарета, (ГӀР) лорий Ӏилмай кандидат; Султиганаькъан Мочха Манас,(Москва) доцент, технически Ӏилмай кандидат; Дарсиганаькъан Ахьмада Амина, лор, тохкамхо (Бельги); Йовлой Мухьмада Муса, тохкамхо, (ГӀР) НИИ Ӏилман болхло, иштта кхы дуккхабараш а. Кхелахой юкъарло царех чӀоагӀа тешаш,цар дӀахо а иштта доккхий толамаш доахаргда аьнна хеташ я»,- аьлар цо.
Дӏахо а вай таханарча заман къонача Ӏилманхоех дувцаш, Боканаькъан Ӏийсас ма дарра дийцар дикача сагах-Йовлой Мухьмада Мусайх лаьца. Из ва тохкамхо, ГӏалгӀайчен, Ӏоахарганаькъан Ч.Э. цӀерагӀча НИИ гуманитарни Ӏилмай исторе отдела Ӏилман болхло.
Цу бӀаьха боацача хоамо йоах, Йовлой Мусас тӀехдика паччахьалкхен университет яьккхар 2012 шера «юриспруденцех» дешаш. Польша Республикан, иштта Лэйна Киркланда программа Паччахьалкхен стипенди далара программа чудоагӀаш, цо шозза дакъа лаьцар бокъоний темах долча тохкамашка, иштта Польски меттала кепа техар ший йоазошта. ГӏалгӀай оагӀон редактор волаш цо дӀахьу интернет-энциклопеди «Рувики», иштта «ГӏалгӀай Википеде» проект, цо массахана Википеде гӀалгӀай оагӀув тоаеш даим болх дӀахьу. Мусас дика болх бу паччахьалкхен архивашка, цо дӀахьу гӀалгӀай къамах бола бӀаьшерен ханашкара хоам гулбеш бола болх. Из дика кхеташ вола тохкамхо ва, цун карагӀдоал хьалаха а тахка а хоам, из кхеташ ва цох, иштта мах оттабе а хов исторически хьалашта а долаш долчунна а.
Уж санна бола нах ГӏалгӀайче хӀара шу мел доал дукхагӀа хулаш боагӀа. Вай мехкахой, бахархой Россе тайп-тайпарча моттигашка а иштта дерригача дунен тӀа а деша багӀа. Уж, шеко йоацаш, вай республикан хургдолчун мах бараш а тӀехьале а я.
