Дукхагӏчунга кхача гӏерташ хьо вале, ӏа хьалххе е къахьега деза цунга кхачара, хьона таронаш лу, из дика гӏулакх леладара. Массайолча хана а хиннад,  лаьрхӏачунга кхачарга дӏадодар  дукха  хеташ. Бакъда кӏеззига сатеха юхахьежача, гуш хул Даьла къахетамца хьайна луш дола дика.

Деша вагӏача хана хӏара  лоадам боаца хӏама а хьатӏаэцаш, дега хала хеташ хул. Къаьстта цу хана волалу дуне ше ма дарра довза, цу хана дӏадолалу, дего хоам беш, бехктокхаме хилар.

Олимпиадо, тайп-тайпарча яхьаша, цу юкъе кхоллама оагӏонаш хиларо бераш майрра дуг шоаш хьалхашка оттадаь декхараш кхоачашдарга. Итт шу да Сурхо тӏа баха Хучбаранаькъан вежарий дешархой дегаш ураувттадеш, цар дикагӏа дешаргдар деш хьабоагӏа. Дешара даькъ тӏа, берий дешарцара безам совбаккха аьнна шоашта дагадехар накъадаьлар царна, хӏара шера дешархошта ахчан премеш, кхыдола совгӏаташ тел вежараша.

«Шера дикагӏа вола дешархо» яхача премена юкъебоагӏа хьехархой, дешархой, дай   дукхагӏа хулаш боагӏа. Дӏадахача шера шоай хьаькъала, кхоллама говзал гойтар  19 ишкола викалаша, карарча шера-25 дешара моттиго, Сурхо тӏара дӏайолаенна Галашка кхаччалца.

«Дика дешараш, олимпиаде котбаьннараш белгалбеш яр даим а хиннай дега еза а боча а хета моттиг», - аьлар цу гӏулакха хьалха эттача  Хучбаранаькъан Адама.

«Юха а юха а бераша дика толамаш гойт, цо хьагойт премеш юкъеяхаро дика  толам баьккха хилар, иштта  тӏахьех берашта дика кхетам балара боккхийбараш», - аьлар хоамо.

Цхьа ха яьлча, преми селхан деша баьгӏарий сийрда  дагалоаттам хинна а ца ӏеш, хьалхашка оттадаь декхар кхоачашдара дола керттера бахьан хургда. Хӏаьта хӏанзарчоа, ерригача республикера  бераш, ондаргаш дешара чуийнна боахк.