Ардара бетта 29-ча дийнахьа дездеш да инсульта духьале еш дола ди берригача мехка. Белгалде деза, инсульт тIехьарча хана геттара къонденна, боккхийбарех санна, хIетта кхийнарех а кхеташ даьржалга.

Цудухьа эггара керттерчарех да, инсульт хиннача сага лораш тIакхачале де деза гIо нийса дар. Лорашка ладувгIаш, цар яхар хьаэцш хила деза вай.

ВIалла а дицде йиш яц, инсульт сага вахара никъ хоадабеш хулилга… цу миноте, е массехк ди даьлча саг дIавоалаш нийслу цу лазарах.

Бакъда, кастагIа нийслур да, саг вийрзе,  дIахо ший гIулакхаш леладе волалулга. 50 шу даланза вола саг заIапхо вий вордингаш чу хоаву инсульто цхьайолча хана, цхьа ха яьлча; юха меттавайя, балха ухаш, лелаш зув вай иштта ваьгIа саг.

Бакъда, дегIа могашал хьалха хиннар хилац, даиман лорашка аха везаш хул.

Мишта лоравала йиш я цу лазарах?

Керта чура пха дотаденнача цIийво дIакъайле, хьаьцарча цIийво бу болх харцахьа хиларах хьахул инсульт. Ишимически инсульт оал цох. Нагахьа, хьаьцара цIийна пха ийккхабале, геморрагически инсульт оал цох. Ишттача хьале Iалаьмате сиха лорашка кхоачаве веза унахо, ханнахьа гIо дар чIоагIа лоархIаме да цу моттиге.

МоллагIа саг ший дегI лорадеш, унахцIенон хьал тоадеш хила веза массахана. Иштта долча лазараша ше кIалвутаргвоацаш, дегIа зе деш мел йола во оамалаш йита еза, буаш бола кхача а хоржаш хила беза, дегI хьоадеш, дегIа боаггIача боараме доал деш ваха веза. Йоккха моттиг дIалоац вай юача хIамо.

Дира, сов хьаьна, геттара мерза кхача буаш ваха мегаргвац хIара денна. Дуача хIаман юкъе дукхагIа хила беза сомаш, хаьсаш, чкъаьра. Ишемически инсульт хилар кхерам болаш да массахана пхаьнашкара цIий боарамал лакхагIа айденна хилар.

Массахана из дусташ, иштта ший дегIацарча шекара, холестерина боарам мишта латт хьожаш хила веза саг.

Инсульт яхар ма хулла чехкагIа лорашта тIакхача веза лазар да, цудхьа, ха ца йоаеш, Iалаьмате чехка дIакхоачаве веза из хиннар дарбанче. Ший дегI дезаш вола саг, массахана цунна доал деш хургва, тIаккха  довзаш хул дегIа хьал. Ма даржийта лазараш вайна юкъе, лоралуш даха!