«Из халкъашта юкъерча класса спорта мастер ва, дунен Кубок а яьккхай цо кхозза. ХьалхагӀа Ислам, 2012 шера, ондаргашта юкъе дунен Хьалхале йоаккхача котваьлар», - аьлар спортсмена хьехамча волча Тутайнаькъан Адама.

Белгалде деза, Ислам 91 кг дозал дарашта юкъе латаш хилар. Говзанчаша цхьа барт болаш оттабаьча маьхага хьежача, цу тайпара дозал долча спортсменаша цкъа хӀама теха вожаву шоашца латаш вар.

Вай мехка чемпионаташ чакхйоах, лакха латт спортсменаш яхьебалара хьал, цига Ислама боккха толам баьккхаб - из дикагӀа вола кикбоксер ва, тактически говзал хиларах, техника хьагойтарах. Цо шийна ховш дар кхы чӀоагӀагӀа дегӀадоаладу,  2012 шера денз, тренера Тутайнаькъан Адама  кулгал деш.

«Вай берий таронаш йоккхий я. Уж зӀамига долча хана денз, терко тӀайохийташ хул спорта.

Вай спорт дикагӀа дегӀайоагӀаргйолаш, уж хьаллоацаш а ахчанца царна эшар лоаттадеш а хила веза. Спортсмена ший мел бола низ тӀабохийт, шийна хьалхашка оттадаь декхар кхоачашдара. Из хала а чоалхане а никъ ба»,-йоах тренера, къонача спортсменашта карагӀдоалар дувцаш.

Адам тренера болх дӀахьош ва укх 20 шера. Цун дика балха говзал я, эггара халагӀа долча спорта даькъ тӀа яхьаш дӀаяхьара. Цунна, ший хана, халкъашта юкъерча класса спорта мастер яха цӀи елар.

ГӀаьзе-Коарча ишколе, чӀоагӀа халача хьалашка, духхьала цхьа спортзал мара йоацача хана, европани дунени боарам бола кикбоксинга спортсменаш хьалкхебе атта дацар. Цо хӀанз хьехаш да 50 бер, цо царна Ӏамаду духьалъотталуш хилар, къахьегама тӀера хилар; майра, шоай спортивни боарам лакхбара тӀакхувш хилар. Цо массекх Россе, дунен чемпион кхеваьв. Къаьстта из санна, шоай гӀулакх дезаш, цох дог лазаш бола нах ба вай тӀехьенна лерттӀа кхетам луш, из нийсача наькъ тӀа хургйолаш хьалкхеераш. Цар шоай аргӀагӀа ГӀалгӀайчен бахархошта дегагӀоз яхь.

Ираза, вай мехка массайолча хана хиннаб дика тренераш, чӀоагӀа оамал йола спортсменаш. Цудухьа, дӀахо дӀайодача хана, коталонаш кхы а хила езаш я, тайп-тайпарча спорта доакъошца ювзаенна.