Каратистий дезал
Ше Ӏомадаьр къонгашта дӀалуш ва хьехамча
Дега дезаденна гӀулакх доаржадеш, дуккхача шерашка къахьег цхьаболча наха. Ювца эттача, дукха тайп-тайпара халонаш духьалъювл къахьегама наькъ тӀа; бакъда, ше леладечох дог ца эккхаш, дӀахо дӀаводар вахаро аьттонга, сийрдача наькъага кхоачаву.
Республикерча каратэх йолча федерацен хьалхалатта физически культуран, спорта цӀихезача болхлочо Шовхаланаькъан Ӏаддал-Ӏазита, хьинаре ший гӀулакха тӀа къахьегаш хьаварал совгӀа, ше дӀадоладаьр дӀаэцаргдараш, дӀахохьоргдараш ураоттабир. 24 шера къахьегар яхар бегаш бац; бакъда цун дог ураоттадер да тахан, цун гӀулакх дӀаходахьа чам болаш къонгаш кхер.
Цхьан хана, 1990-ча шерашка, Брюс Ли, Джет Ли чуболаш хьахьокхаш хиннача киношка хьежаш, спорт чӀоагӀа езаелар цунна.
ЧӀоагӀа безабелар къонача Ӏаддал-Ӏазита каратэна юкъе Кекусинкай яха оагӀув боаржабаь Масутацу Оям. Иштта дӀадоладелар японски латараш Ӏомадеш дола гӀулакх.
Планашкарча (Карцарча) № 20 йолча ишколе цӀихезача тренерца Чопанаькъан Русланаца Ӏомалуш бар цун вежарий Руслан, Адам.
Уйла е эттача, «каратэ» яхар «даьссача кулга никъ» яхилга да. Цох кхетаду вай, из гӀулакх карадерзаде мел атта дац.
- Хала ханаш яр цу хана лаьттараш, - дагаух воккхача тренера.
- Эшараш, кхоачамбоацараш дукха хиларо ма хетта дӀабахийтацар болх. Тахан хӀара юрта ФОКаш яле а; цу хана вӀалла дага а дацар ишттача аьттонга вай кхоачарг ма дий, аьнна. ХӀаьта а ишколашка кийчо еш, йоккхача яхьашкара котало яхьаш цӀаухар вай кагирхой.
Шовхаланаькъан Ӏ-Ӏ. эггара лоархӀаме хетар, лакхача лагӀа тӀа валар, говза спортсменаш кхебар.
2004-ча шера саг йоалайир тренера. ТӀехьагӀо, Илдарха-ГӀалий тӀарча шоай хьехамчах доаккхал деш хилар бераш. ЦӀен воккхагӀвола каратист Адам дунен яхьашкара дотув дахьаш вера, СКФО яхьашкара котало ера.
13 шу даьнна Илез каратэх йолча Дунен яхьашка шозза котваьлар, иштта Россе яхьашка а белгалваьлар. Мехкарча, ерригача Россерча, къамашта юкъерча яхьашка дакъа лоацаш хьабоагӀа уж. Каратэ хьехарах ший дег чу чӀоагӀденна гӀулакх лоархӀ Ӏаддал-Ӏазита.
ХӀара шера лакха начӀал дола говзанчаш арахецаш хьавоагӀа из. Цо хьийхараш массехк шу даьлча а, юха тӀаухаш, баркал оалаш, цунна ловцаш доахаш хул. ЧӀоагӀа сатохаш, сабаре, ше леладер бехктокхаме дӀахьош саг ва из.
Тайп-тайпара совгӀаташ телаш белгалбаьб цун болх, хӀаьта эггара лоархӀамегӀа дола совгӀат «Укх шерара тренер-2023» яхача яхьашка котало яккхар да.
Шовхаланаькъан Ӏаддал-Ӏазит яхь йолаш, ший гӀулакх эздий чакхдоаккхаш хьавоагӀа. Бера хана спортсмен хила ловш хинна уйлаш, тахан кхоачашхиннай. Ше лийрхӀачул дуккха дукхагӀа де аьттув баьннаб цун.
Аьттув болаш, беркате хилба цун дӀахо дlахьош бола никъ! Иразе вахалва из!
