«Са бизнес» яха моттиг мехкара грантови экооагӏон доакъашхой тӏаозаш яр. 2025-ча шера хьайийллар Магасе ПФКИ проектни офис. Цо болх дӏахьоча ийс бетта культуран оагӏонцара грантови гӏулакх доаржадеш къахьег мехка. Офиса тоабо гранташ хьаийцарашца дикка толамаш даьхад ала мегаргдолаш да тахан, хӏаьта Ганза пхи шу дузача дийнахьа иштта хьинаре дӏахо дӏабахьа безача балхах дувцаш бар уж.

«Са бизнес» яхача моттигах дикка пайда хьабаьннаб проектни офиса балха. Республикан куц хувцаш йола проекташ укхаза хьакхоллаш, йоаржаеш я. Дега чӏоагӏа тоам беш да из хӏама. Ийс бетта цхьа хӏама кхетадаьд оаха: культура, бизнес цхьана болх дӏахьош хила деза. Аьттув хилба Ганза, хӏара доакъашхочун никъ дикка толамаш долаш хилба. Беркате хилба шун болх, доттагӏий!» - аьлар «Са бизнес» яхача оагӏон кулгал деча Албохчанаькъан Исмаӏала.

Наьсарерча ПФКИ хьалха латтача Чуранаькъан Мухьмада ший къамаьла юкъе белгалдир проектни офисага гӏолла культуран оагӏув хьаллацарца а хувцамаш хиннилга. Укх пхе шера мехка йоаржаяьй эзараш боккъал башха йола проекташ. Хӏаьта оаха Гӏалгӏай мехка дӏахайтар, хӏама хьакхолла, толамца дӏадахьа, коталонга кхача республике аьттув болга. «ПФКИ – лоархӏаме дола гӏулакхаш доаржадеш бола оагӏув ба тахан. Наьсарерча проектни офиса тахан дикка пайда беш болх дӏахьу. Ганза доакъашхой, из лоархӏаме гӏулакх хьаллоацаш мел барий доккхача дикашка кхача низ, аьттув хилба, шортта беркате проекташ хьакхолла хьинар хилда», - белгалдир бувзама, къаман политикан, кепайоазон, хоамий гӏулакхех йолча министерствон кулгалхочун гӏонча волча ӏалбаканаькъан Артура.

ПФКИ ше йолча юкъа, хӏама хьаде ловчарна нийса никъ хьехаш, де дезар хьалхадоаккхаш, ӏомавеш йола семинараш, сессеш йоаржаеш, дехар чулуча хана новкъостал деш, къахьийгад. Иштта оагӏув хьаллоацаш хиларо моттигерча тоабашта шоай гӏулакх, кхера ца кхераш, майрагӏа дӏадахьа, доаржаде гӏо даьд. Магасерча администраце кулгалхочун гӏонча волча Мутаӏаланаькъан Ислама белгалдечох, Наьсаре хьайийллача офиса ше геттара эшаш, йоагӏаш хьайийллалга хьагойташ болх дӏабихьар. Ганза гранташа мехкарча моттигий куц эргадоаккх, кагирхой тӏаозаш болх лоаттабу, иштта къаман беркате дола ӏадаташ лораду, доаржаду. Президентски ганза Проектни офиса тоабан тахан пхи шу дузача дийнахьа, чӏоагӏа лоархӏаме да укх денга кхаччалца шоаш хьабена болх боаггӏача боараме, къаман юкъе пайда боаржабеш, мехка дика хургйола проекташ хьаллацара тӏехьа дӏабихьа хиларах дог тийша хилар. Къаман культуран оагӏонца, кхолламца дувзаденнарашта керда никъ хьабеллаш бола лоархӏаме болх ба ала йиш я цох.