«ХьалхагIа а шоашта эшача хIаман филиала болхлошта тIаболхаш, царца бувзам лелабеш хиннаб бувца дезал. Цу наьха хьашташ кхоачашдара тIехьа, тахан мехка лакха терко еш ба, цунга хьежжа цхьаккха тайпара цар дехар терко йоацаш дусаргдац. Укх наькъа а цар гIулакха сиха оарцагIбаьлар ганза филиале.

ЖIайрахьа кхален дарбанчен кулгалхочунца цу сахьате бувзаме баьнна, СВО бIухочун йиша, нана Iобувшабергболаш моттигаш кийчъяйтар цар. Ганза филиала болхлоша шоай декхараш боаггIача боараме кхоачашдеш хиларах, ханнахьа лорашка чакхбаьнна, шоай могашал меттаоттаеш дарбанче ха яккха аьттув баргба цу наьха», - йоах «Сердалога» цу моттигера бенача хоамо.

Боккхача, барт тайна бахаш болча дезале кхоалагIа вола воI вар Хьажмурд. Галашка малхаваьнна, цига кхийна, къаман беркате дола Iадаташ цига Iомадаь вар из. Бера хана денз, ший ханарчарна юкъе ший тайпара белгала волаш, кхийна ваьнна дIаэттача деналах визза вола воI хургволга хоалуш вар из. Новкъосташа, из вовзараша деча тешалах; аьннача дош долаш, эздел, яхь, гIулакх долаш, саг вар.

ТIема аренашка Даьхен хIама лораде вахар из, ше раьза волаш, из никъ хьаийца. Цига а дика цIи тIехьа йолаш, дог дизза майра бIухо ва оалаш, вар из. 2024-ча шера бекарга бетта тIема геттара лоархIаме декхар кхоачашдеш, турпалал гойтар Хьажмурда.

Массанена дIахьалхаэтта, беррига низ шийна хьатIаийца, кхерам тIабоагIилгах тIехьалаттарашка хоам бе кхийра цун. «Денал хиларах» яха майдилг енна вар из тIема аренашка, кхалхачул тIехьагIа хьожайир цунна Денала Орден. ЦIагIа ши бер, цIен - нана юсаш; вахар хаьдар майра дог хиннача вай мехкахочун.

Келаматанаькъан цIен боккха эшам, дийца варгвоаца доккха халахетар хилар цох. ВоI дIаваьнна бисарий дегашта тем бе хала да, цхьаккха дешаша, гIулакхо ерзаеш чов яц из. Хажмурада тIехьа СВО вахар цун зIамагIа вола воша Iарби а. Таханарча дийнахьа де доацаш бейнарашта юкъе ва из. ЦIагIарча наха вIалла а дIатIаэца магац из хIама… ЧIоагIа дог тийша ба уж, шоай воI могаш, маьрша волаш цIенах кхетарг хиларах.

Цхьан виIий вахар тIема аренашка хадар, шоллагIа вола воI кора ца воагIаш хилар ди, бийса доацаш цIагIарча нахага гIайгIа яйташ, деной сердал, паргIато йоаеш хIама да. Яхь, денал, сий, къонахчал яхача дешай маIан дизза довзийташ, уж еррига оамалаш ший къаман визза воI волча къонахчун дегIаца хила езилга хьалхадоахаш, ураоттабаьбар уж дас, нанас.

Цхьаккха а ма отталва, ший къонгашта тIехьа гIайгIа еш, бIаргаш лешаде! Цу наьха хьал могачох аттача даккха хьожаш, даиман бувзаме болаш, гIо ийшача цу сахьате оарцагIбахка кийча болаш хургба ганза мехкарча филиала болхлой.