Нийса болар, тоаба са
ГӏалгӀай мехка дӀайихьар хьалхара Россе СК кадетий классай Фестиваль
Халкъашта юкъера берий бокъонаш лораяра ди долаш, Наьсарен №19 йолча ишкола боккъонцахьа йола кадетий вошала майда хилар. Россе Тохкама комитета тохкама урхаллено, ишкола кулгалхошца цхьана боккха кхетачен болх дӀабихьар, цига гулбелар ерригача ГӏалгӀайчера дикагӀа бола кадеташ.
«Кадетий кхаь даькъах латтача яхьашка вӀашагӀкхийтар чӀоагӀагӀа йола кхо тоаба: Магас-Шахьара №1 йолча ишкола-берий беша дешархой, Шолжа- Шахьара №4 йолча Келаматанаькъан А.М. цӀерагӀча ишкола дешархой, иштта тӀаэцаш йола Наьсарен-Шахьара №19 йола ишкол», - аьлар «Сердало» газетага ГӏалгӀайчен Тохкама комитете.
Цӏай дӀадоладелар лаьрххӀача оагӀон тӀара. Мехка Гимна оазаца Россе Тохкама комитета дикагӀа болча кадеташа хьалъаййир Российски Федераце, ГӏалгӀай Республикан Паччахьалкхен байракхаш.
Моаршал хоаттача дешашца берашка кхайкарал дир №19 йолча ишкола кулгалхочо Ӏарчакханаькъан Марета, иштта мехка тохкама урхаллен кадрай отдела кулгалхочо Йовлой Ахьмадхана.
Цар белгалдир, кадетий болам - из духхьал дешар хинна Ӏац, из юкъарлон гӀулакх дар, денал хилар дӀадехаш бола никъ ба. Из болх вӀашагӀбеллараша берригача доакъашхошта ловца баьккхар, цу яхьашка котало яккха аьттув хилара тӀехьа.
Кадетий классай Фестивала программа дика вӀашагӀъеллаяр, из хьежар керда юкъедоаладаь «Кхерамзлен кӀийле, «Даьхе лораяр» яха ӏилма царна мишта довз. Кадеташа дика къахьийгар, физически кийчо яь хилар гойташ.
Майдан тӀа дӀаболабелар къовсам. Кӏаьнкаш, йиӀигаш яхьебаьлар Калашникова автомат вӏашагӏйоаккхаш, вӀашагӀйоллаш, поатронаш ахкар чу чуйохка гӀулакх шоашта довзий хьожаш, хьалхара новкъостал нийса дар гойташ.
Бераша гойтар шоаш дика кийчо яь хилар, оамалца хилар, иштта тоабашца цхьана болх бе хар - хӀаравар шоайла хьаллоацаш хилар, тӀеххьарча поатронга кхаччалца.
Цар балха мах оттабеш хиннарашта а кхы аттагӀа дацар, бакъда баллаш дӏалаьрхӏачул тӀехьагӀа, котбалара Кубок, «дошо моттиг» яьккхар Наьсарен шахьара №19 йолча тоабо. Дотув даьккхар Шолжерча №4 йолча Келаматанаькъан А.М. цӀерагӀча ишкола кадеташа, хӀаьта борза совгӀаташ даьхар Магас-Шахьара №1 йолча СОШ-ДС.
Керттерча кубкаел совгӏа, из болх вӀашагӀбеллараша грамоташ, майдилгаш елар дикагӀа болча доакъашхошта, къаьсттача яхьий программаца дувзаденнарех.
Цӏай чакхдоалаш Йовлой Ахьмадхана дег тӀара даькъалабийцар беррига кадеташ, баркал аьлар царна хоза ловзар дӀадахьарах.
Россе Тохкама комитета кадетий классай хьалхара Фестиваль дӀаяхьаро, ГӏалгӀайче хьакхеллар керда дика Ӏадат, цо вӀашагӀтох хургбола Даьхен лорабой.
