«Кхетаче дӏахьош хиннарашта юкъе вар вай мехкадаь гӏонча вола, Россе цӏихеза юрист Къоастой ӏийса, Амренаькъан Марем - «Гӏалгӏай къаман исторически дагалоаттам» яхача ганза кулгалхо, Оздой Лида – Мехкадаь, Паччахьалкхен Администраце оагӏонцарча паччахьалкхен бокъоний керттерча моттига кулгалхо, иштта цига бар археологаш, историкаш, кхоллама, кхыдолча оагӏонашцара болхлой», - дийцар «Сердалога» ИнгНИИ зарбан болх лелабеча Бӏарахой Мадинас. Института тохкама оагӏон проекта гӏулакхах дувцилга керте оттадир кхетаче, иштта кхыдола лоархӏамедараш белгалдеш къамаьл дир цига. 

Царна юкъе дар гӏалгӏай къаман истореца, культураца дувзаденнарашта тӏагӏолла болх лоаттабар, цу оагӏонашцара республикера проекташ хьаллацар, пайда хургболча тайпара йоаржаяр; истореца, культураца ювзаеннача моттигашта тохкамаш дар. Иштта цига дийцар, Гӏалгӏайчен Паччахьалкхен 100 шу дизара хетаяь аллей хьаелларах Магасе. Лаьрххӏа тоаба вӏашагӏъеллаяр цу гӏулакхаца дувзаденнараш белгалде. Гӏалгӏай къаман хӏама боаггӏача боараме белгалдеш хила еза аллей. 

Истореца, культураца дувзаденнараш теркаме лоацаш чакхбаккха безаш болх ба из.  Цу проектаца дувзаденнараш йиллача хана кийча хила дезаш да. Цу юкъе да аллея куц мишта хургда гойтар, мах оттабар, берригача балхаца дувзаденнараш. Гӏалгӏай ӏилма-тохкама институте дӏайихьа из кхетаче лоархӏаме я вай къаман исторе, культуран оагӏонашцара хӏама дийндара тӏехьа. Аллея проектах йола тохкама балхацара тоаба вӏашагӏйоллар цу оагӏонца баьккха лоархӏаме гӏа ба ала йиш я тахан. Массане хьаллоацаш, беркате гӏулакх да из.