«Из хьалхара цу тайпара кхетаче я ГӏалгӀай мехка, из вайна лоархӀаме а я. Цо новкъостал дергда унзарча хьалашца къовсам лоаттабе, цо иштта таро лу бахархой культура кхолла, законаш лораде.

Доакъашхой таро хургья дикагӀа йола дешара программаш йовза, бувзам чӀоагӀбе балха новкъосташца, эксперташца, иштта грантах луш дола ахча даккха, шоай дикагӀа йола социальни проекташ кхоачашъяр духьа. Тхона из тема геттара чӀоагӀа лоархӀаме я - ГӏалгӀайчен ший къаьстта йола поалхам я терроризмаца къовсам лоаттабара, теракташ бахьан долаш кӀезига зе хинна яц из, цу юкъе маьрша нах а болаш. Вай декхар да цу тайпара хӀама кхы хургдоацаш деррига де, вай берий кхоане кхерамзленца Ӏалашъе», - иштта аьлар, цу хьалах дувцаш, ГӏалгӀайчен кулгалхочо Келаматанаькъан Махьмуд-Ӏаьлас.

Сатувсилга я; кхетаче пайдане а шоайла балха говзал дIа-юха эцара даькъ тӀа дика лар юташ а хургья, аьнна. Иштта цу даькъ тӀа дувца лерхӀ экстремизма, терроризма духьалъоттара хаттараш.

Цун доакъашхой таро хургья шоашта хьалхашка нийсденначох дувца меттел, шоай говзал гулбеннарашца екъа а .

Кхетачен программа чудоагӀаш да дукха пайданедараш, цу юкъе дакъа лоацаш хургба бокъонаш лораераш, юкъара болх бераш, республикан дин викалаш, иштта дӀадахьа лерхӀ говзанч-хьехамаш. Уж лаьрхӀа да кхерамзлен Ӏалашо яра, латта хьал белгалдара, довзийтара, хьалхадаккхара, цу даькъ тӀара болх тоабара, наха из дикагӀа бовзийтара.

Кхетаче тӀахьехаш я ГӏалгӀайчен кхерамзле чӀоагӀъеча керттера дакъа лацара, иштта зуламашта духьале яра хьал мехка дика вӀашагӀдоллара. Доакъашхоша цхьана дувцаргда хаттараш, уж кхоачашдара наькъаш лохаргда, юкъарча гӀулакха тӀехьаэтта, республикан берригача бахархошта кхераме доаца вахар хилийта хьожаргба.

«Сердало» газетага ма аллара, «ГӏалгӀайче - кхерамзлен мохк» яхача кхетачен тӀеххьарча дийнахьа хургья грант яккхара яхьаш. Роскагирхошкара цига дакъа лаца таро йолаш ба, 16 шергара 35 шерга кхаччалца ха яьнна кагирхой. Цар тахан терроризма, экстремизма духьала беча балха юкъедахьаш дола дакъа малагӀа да хьежжа, цунна мах оттабергба федеральни эксперташа.

Яхьа чаккхе еш, котбаьннарашта гранташ лургья, шоай проекташ кхоачашъе. Цу юкъера грант 300 эзар сомага кхаччалца хила йиш я. Эггара сийрдагӀа йола оагӀув я грантий яхье котбаьннарашта совгӀаташ далар, из вӀашагӀъеллай кагирхой гӀулакхах йолча Федеральни агентствос.

Цу кхетаче дакъа лаца безам барий кхы а ха я дIаязбала. Уж дIаязбу «Кагирхой Россе» ше-ше болх беча чоалха гIонца. Цу онлайн-кIийлено таро лу моллагIча моттига юкъе дакъа лаца дехар чудала, цул тӀехьагӀа цох фу хул хьажа, цига гӀолла лоархӀаме хоам бовза, из вӀашагӀъелларашца гӀулакх леладеш.

Таханарча заман дунен тӀа экстремизма, терроризма хаттараш кагирхошта юкъе геттара лоархӀаме дерзаш латт. ГӏалгӀай мехка кхаь дийнахьа дӀабахьа лаьрхӀа болх цу майдан тӀа боаккхаш бола лоархӀаме, кхераме доаца вахар вӀашагӀдолла гӀа ба.

Кхетаче хьаийцар, Ӏомадаьр накъадаргда халкъашта юкъера барт чӀоагӀбеча, республикан наьха культура лакхъеча. Кхетачен программа дика дӀаяхьаро дика лард йолларгья, къамашта юкъера гӀулакхаш чӀоагӀдеш.